لاہور، 14مارچ (اے پی پی): صوبائی وزیر صنعت و تجارت چوہدری شافع حسین کی زیر صدارت رمضان مانیٹرنگ وزارتی کمیٹی کا اجلاس منعقد ہوا جس میں صوبائی وزراء بلال یاسین، مجتبی شجاع الرحمن، عاشق حسین کرمانی، سیکرٹری صنعت و تجارت احسان بھٹہ ،ڈی جی انڈسٹریز اور متعلقہ افسران نے شرکت کی۔ پاکستان وناسپتی مینو فیکچرز ایسوسی ایشن کے وائس چیئرمین منیب منوں کی قیادت میں وفد نے خصوصی شرکت کی۔ اجلاس میں گھی مینو فیکچرز کا پنجاب بھر میں گھی کی قیمتوں میں 15روپے فی کلوگرام کمی کا اعلان کیا جس کا اطلاق آج سے ہی ہوگا۔
صوبائی وزیر صنعت و تجارت چوہدری شافع حسین نے کہا کہ گھی مینو فیکچرز کی جانب سے ماہ مقدس میں گھی کی قیمتوں میں کمی کے فیصلے کا خیر مقدم کرتے ہیں۔ انھوں نے کہا کہ وزیر اعلیٰ پنجاب کی ہدایت پر عوام کو ریلیف کی فراہمی کے لئے ہر ضروری اقدام کیا جارہا ہے۔
صوبائی وزیر صنعت و تجارت نے گھی مینو فیکچرز کے مسائل ترجیحی بنیادوں پر حل کرنے کی یقین دہانی بھی کرائی۔
وناسپتی مینو فیکچرز ایسوسی ایشن کے وفد میں طارق اللہ صوفی، عابد ملک، محمد وحید چوہدری اور دیگر شامل تھے۔
