لاہور، 17 مارچ (اے پی پی): وزیر تعلیم رانا سکندر حیات نے سپیشل انیشئیٹو پولیس سٹیشن گلبرگ اور پولیس خدمت مرکز شادمان کا دورہ کیا ۔اے ایس پی شہر بانو نقوی نے صوبائی وزیر کو سپیشل انیشیٹو پولیس اسٹیشن، سائبان آفس اور خدمت مرکز کا دورہ کروایا اور پولیس سٹیشن اور خدمت مرکز کو جدید انفراسٹرکچر، ٹیکنالوجی، آئی ٹی سہولیات سے ہم آہنگ کرنے حوالے سے آگاہ کیا۔وزیر تعلیم کو سپیشل انیشیٹو پولیس اسٹیشن اور خدمت مرکز میں شہریوں کیلئے دستیاب جدید سہولیات اور انفراسٹرکچر ڈویلپمنٹ بارے آگاہی دی گئی ۔
صوبائی وزیر نے ڈرائیونگ ٹریننگ سمولیٹر، فرنٹ ڈیسک، پولیس اسٹیشن گائیڈ سمیت دیگر سہولیات پر خوشگوار حیرت کا اظہار بھی کیا۔وزیر تعلیم نے ڈرائیونگ ٹریننگ سمیولیٹر چلا کر خود بھی سہولت کا مشاہدہ کیا ۔رانا سکندر حیات کو سائبان دفتر میں کمیونٹی سنٹر اور دیگر شعبوں کا دورہ بھی کروایا گیا ۔
وزیر تعلیم رانا سکندر حیات نے خدمت مرکز کے سٹاف اور عام شہریوں سے مسائل بارے بھی آگاہی حاصل کی ۔انہوں نے کہا کہ سپیشل انیشیٹو پولیس اسٹیشنز اور پولیس خدمت مراکز پبلک سروس ڈلیوری کے شاہکار پراجیکٹ بن چکے ہیں۔انھوں نے کہا کہ پولیس خدمت مرکز شادمان میں ڈرائیونگ ٹریننگ سمولیٹر کی سہولت خواتین کیلئے خوشنما اضافہ ہے۔
وزیر تعلیم نے کہا کہ پولیس خدمت مرکز سے خواتین اپنی شکایات ازالے و راہنمائی بارے بھرپور استفادہ کر سکتی ہیں۔ انھوں نے کہا کہ تھانوں کی اپ گریڈیشن اور انفراسٹرکچر ڈویلپمنٹ نے پنجاب پولیس اسٹیشنز کا تشخص مکمل بدل دیا ہے۔ صوبے کے تمام تھانوں کے فرنٹ اینڈز کے بعد بیک اینڈز کو جدید تقاضوں کے مطابق اپ گریڈ کیا جائے گا۔انہوں نے کہا کہ پولیس دفاتر کی اپ گریڈیشن سائلین کیلئے خوش آئند ہے۔
