لاہور،19مارچ (اے پی پی ): وزیراعلیٰ پنجاب مریم نواز شریف سے ایران کے قونصل جنرل مہران مواحد فر نے ملاقات کی ۔وزیر اعلیٰ مریم نواز شریف کو منصب سنبھالنے پر مبارکباد پیش کی وزیر اعلیٰ مریم نواز شریف نے ایرانی قونصل جنرل مہران مواحد فر کا شکریہ ادا کیا ۔ملاقات میں دو طرفہ تعلقات کے فروغ اور باہمی تعاون بڑھانے کے حوالے سے تبادلہ خیال کیا گیا اور باہمی ایکسپورٹ بڑھانے کی ضرورت پر زور دیا گیا۔
وزیر اعلیٰ مریم نواز اور ایرانی قونصل جنرل نے ثقافتی وفود کے تبادلے پر اتفاق کیا اور اس سلسلے میں فوری اقدامات کا اصولی فیصلہ کیا گیاخیر سگالی کے طور پر 20مارچ کو نوروز کی مناسبت سے بادشاہی مسجد میں چراغاں کیا جائے گا۔دونوں ممالک کے درمیان یوتھ کلچر ایکسچینج پروگرام کے فروغ کا فیصلہ بھی کیا گیا۔
ملاقات میں گفتگو کرتے ہوئے وزیر اعلیٰ پنجاب مریم نواز شریف نے کہا کہ ایران کے ساتھ باہمی زرعی تجارت کو بڑھانا چاہتے ہیں۔ پاکستان اور ایران ایک دوسرے کے ساتھ ثقافتی اور مذہبی طور پر جڑے ہیں عوام کا تاریخی رشتہ صدیوں پر محیط ہے تعلقات کو بلندیوں پر لے جانا چاہتے ہیں۔
ایران کے قونصل جنرل مہران مواحد فر نے اس موقع پر کہا کہ وزیر اعلیٰ مریم نواز شریف کا پاک ایران تعلقات بڑھانے کا ویژن قابل تعریف ہے۔ پاکستان کے ساتھ تعلقات کا مستقبل درخشاں ہے۔
ملاقات میں سینئر صوبائی وزیر مریم اورنگزیب بھی موجود تھیں۔
