لاہور، 04 اپریل(اے پی پی): صوبائی وزیر محکمہ صحت و ایمرجنسی سروسز پنجاب خواجہ سلمان رفیق نے سروسز انسٹی ٹیوٹ آف میڈیکل سائنسز آڈیٹوریم میں پروونشل سٹروک مینجمنٹ سنٹر کی افتتاحی تقریب میں بطور مہمان خصوصی شرکت کی ۔
وزیر محکمہ صحت و ایمرجنسی سروسز پنجاب خواجہ سلمان رفیق نے شرکاء سے خطاب کرتے ہوئے کہا کہ پروونشل سٹروک مینجمنٹ سنٹر کے انتہائی خوبصورت پراجیکٹ کے انعقاد پر پروفیسر ڈاکٹر قاسم بشیر کو شاباش دیتا ہوں۔ انھوں نے کہا کہ فالج کا علاج ایک مہنگا علاج ہے۔ حکومتی سطح پر پروونشل سٹروک مینجمنٹ سنٹر پراجیکٹ کا آغاز انتہائی خوش آئند ہے۔ خواجہ سلمان رفیق نے کہا کہ ہمارے ڈاکٹرز اور ریسکیوئرز پوری قوم کیلئے قابل فخر ہیں۔ سرکاری ہسپتالوں میں جاری ری ویمپنگ منصوبے کو فاسٹ ٹریک پر مکمل کرنے کی کوشش کررہے ہیں۔ انھوں نے بتایا کہ وزیر اعلیٰ پنجاب مریم نواز شریف نے ری ویمپنگ منصوبے کیلئے گزشتہ ہفتے ہی سولہ ارب روپے کی رقم کی منظوری دی ہے۔ صوبائی وزیر نے کہا کہ اس وقت پاکستان حالت جنگ سے گزر رہا ہے۔ ہمیں آپسی اور سازشی سیاست چھوڑ کر اب ملک کی خاطر کچھ بہتر کرنا چاہئے۔ انھوں نے کہا کہ محکمہ صحت پنجاب میں کالی بھیڑوں کی کوئی جگہ نہیں ہے۔ سفارشی کلچر کے سخت خلاف ہوں۔ ہمارے ڈاکٹرز اور ریسکیوئرز عوام کے دکھوں کو کم کرنے کی کوشش کرتے ہیں۔ صوبائی وزیر نے کہا کہ وزیر اعلیٰ پنجاب مریم نواز شریف اپنے بزرگوں کے نقش قدم پر چلتے ہوئے عوام کی خدمت کرنا چاہتی ہیں۔ سیکرٹری ایمرجنسی سروسز پنجاب ڈاکٹر رضوان نصیر نے افتتاحی تقریب کے شرکاء سے خطاب کرتے ہوئے بتایا کہ محکمہ ایمرجنسی سروسز پنجاب ابھی تک ڈیڑھ کروڑ لوگوں کو ریسکیو کر چکا ہے۔ ریسکیوئرز نے بروقت خدمات سر انجام دیتے ہوئے ساڑھے چھ سو ارب کے نقصانات کو بچایا ہے۔
