عوام کی جان ومال کی حفاظت کے دوران زخمی غازی اہلکار ہمارا قیمتی سرمایہ ہیں؛انسپکٹر جنرل پولیس عبدالخالق شیخ

28

کوئٹہ، 15 اپریل(اے پی پی): انسپکٹر جنرل پولیس عبدالخالق شیخ نے کہا ہے کہ عوام کی جان ومال کی حفاظت کے دوران دہشتگردوں کی فائرنگ سے زخمی ہونے والے غازی اہلکار ہمارا قیمتی سرمایہ ہیں جن کی بہترین ویلفیئر، علاج معالجے اور جلد از جلد بحالی کیلئے تمام دستیاب وسائل کو بروئے کار لایا جارہا ہے۔

 ان خیالات کااظہار انہوں نے سی ایم ایچ کے دورے کے موقع پر زخمی پولیس اہلکاروں ہیڈ کانسٹیبل احمد خان ،کانسٹیبل سرفراز احمد کی عیادت کے موقع پر کیا۔ عبدالخالق شیخ نے کہاکہ فیلڈ میں فرائض سر انجام دینے والے افسران واہلکار فرنٹ لائن سپاہی ہیں جنہیں کسی صورت تنہا نہیں چھوڑا جاسکتا۔ انہوں نے کہاکہ ایسے فرض شناس اور بہادر افسران و اہلکاروں کی ہیلتھ ویلفیئر کیلئے ترجیحی اقدامات میں کمی نہیں آئے گی، جو قلات میں ڈیوٹی کے دوران دہشتگردوں کی فائرنگ سے زخمی ہو گئے تھے ۔

آئی جی پولیس بلوچستان نے زیر علاج اے ٹی ایف اہلکاروں کی عیادت کی ، جلد صحتیابی کی دعا اور نیک خواہشات کا اظہار کیا۔

آئی جی پولیس بلوچستان نے طبی ماہرین سے اہلکاروں کے علاج معالجے کی تفصیلات معلوم کیں اور زخمی اہلکاروں کو علاج معالجے کی بہترین سہولیات فراہم کرنے کی ہدایت کی۔