اسلام آباد ،15اپریل( اے پی پی): وزیراعظم پاکستان کے کوآرڈینیٹر برائے صحت، ڈاکٹر ملک مختار احمد نے پیر کے روز پاکستان انسٹی ٹیوٹ آف میڈیکل سائنسز میں ایوننگ آؤٹ پیشنٹ ڈیپارٹمنٹ (او پی ڈی) کا افتتاح کیا۔
ڈاکٹر ملک مختار احمد نے وفاقی سیکرٹری برائے صحت، افتخار علی شلوانی اور پمز انتظامیہ کے سینئر حکام کے ہمراہ سرجیکل یونٹس اور تشخیصی سہولیات سمیت مختلف شعبوں کا دورہ کیا اور پمز کی طرف سے فراہم کردہ خدمات بشمول پیشنٹ کئیر، انفراسٹرکچر، طبی آلات، اور عملے کی صلاحیت کے معیار کا جائزہ بھی لیا۔
اس موقع پر اپنے خطاب میں ڈاکٹر ملک مختار نے کہا کہ شام کی او پی ڈی ان مریضوں کو سہولت فراہم کرے گی جو کام یا دیگر مصروفیات کی وجہ سے دن کے وقت ہسپتال جانے سے قاصر ہیں، اور عوام کو فراہمی صحت کے لئے کئے جانے والے اقدامات میں یہ ایک اہم سنگ میل ہے جس کا مقصد علاج و معالجے کی رسائی کو معمول کے اوقات کار سے آگے بڑھانا ہے۔
کوآرڈینیٹر برائے صحت نے مزید کہا کہ شام کی او پی ڈی کا افتتاح ھیلتھ سروسز کے چیلنجز سے نمٹنے اور عوام کے لیے صحت کی خدمات تک رسائی کو بڑھانے کے لیے حکومت کے فعال انداز کی عکاسی کرتا ہے۔ انفراسٹرکچر ، ہیومن ریسورس، اور ھیلتھ کیئر کے جدید ماڈلز اپنا کر حکومت کا مقصد صحت کے نتائج کو بہتر بنانا اور تمام شہریوں کی فلاح و بہبود کو یقینی بنانا ہے۔
