ہیلتھ انشورنس پروگرام میں مزید بہتری لا رہے ہیں،صوبائی وزیر صحت خواجہ سلمان رفیق

لاہور۔ 17 اپریل۔( اے پی پی ) صوبائی وزیر صحت خواجہ سلمان رفیق نے محکمہ سپیشلائزڈ ہیلتھ کیئر اینڈ میڈیکل ایجوکیشن میں سی ای او اسٹیٹ لائف انشورنس کمپنی شعیب جاوید حسین سے ملاقات کی۔اس موقع پر سیکرٹری صحت پنجاب علی جان خان، سی ای او پنجاب ہیلتھ انشی ایٹو مینجمنٹ کمپنی ڈاکٹر علی رزاق، سی او او شمشاد علی خان، سی ایف او بلال بٹ، ڈائریکٹر پروکیورمنٹ محمد منیب اور ڈویژنل ہیڈ سلک اشعر اور ڈاکٹر نور موجود تھے۔صوبائی وزیر صحت خواجہ سلمان رفیق اور سی او اسٹیٹ لائف انشورنس کمپنی شعیب جاوید حسین کے درمیان ہیلتھ انشورنس پروگرام میں مزید بہتری لانے کیلئے مختلف تجاویز پر تبادلہ خیال ہوا۔صوبائی وزیر صحت خواجہ سلمان رفیق نے اس موقع پر اظہار خیال کرتے ہوئے کہا کہ ہیلتھ انشورنس پروگرام میں مزید بہتری لا رہے ہیں۔صحت کارڈ کے منصوبے کو شروع کرنے کا کریڈٹ میاں محمد نواز شریف کو جاتا ہے۔وزیر اعلیٰ پنجاب مریم نواز شریف ہیلتھ انشورنس پروگرام کے حقیقی ثمرات عام عوام تک پہنچانا چاہتی ہیں۔انہوں نے کہا کہ موجود ہیلتھ انشورنس پروگرام میں نقائص کو دور کرنے کی کوشش کر رہے ہیں۔ ہیلتھ انشورنس پروگرام کو انشاء اللہ عام عوام کیلئے سود مند بنائیں گے۔ اصلاحات کے بعد بزنس نجی سے سرکاری شعبہ میں آنا شروع ہو گیا ہے۔