اسلام آباد ،17اپریل (اے پی پی): صدر مملکت آصف علی زرداری سے بدھ کے روز پاکستان میں ترکیہ کے سفیر ڈاکٹر مہمت پیکاسی نے ملاقات کی جس میں دوطرفہ تجارتی، معاشی ، تعلیمی اور ثقافتی تعاون مزید بڑھانے پر تبادلہ خیال کیا گیا۔
ملاقات میں صدر مملکت نے ترک کمپنیوں کی پاکستان میں سرمایہ کار دوست پالیسیوں سے فائدہ اٹھانے اور ترک کمپنیوں کی پاکستان اسٹاک ایکسچینج کے ذریعے سرمایہ کاری کی تجویز کا اعادہ کیا۔
صدر مملکت نے کہا کہ پاکستان اور ترکیہ کی عوام کے درمیان تاریخی اور دیرینہ تعلقات ہیں، دونوں اقوام نے ہمیشہ مشکل وقت میں ایک دوسرے کا ساتھ دیا ہے اور پاکستان انفراسٹرکچر کی ترقی سمیت ترکیہ کے ترقیاتی تجربے سے مستفیدہو سکتا ہے۔
ملاقات میں علاقائی روابط کے فروغ کیلئے صدر مملکت کی دونوں ممالک کے مابین ریلوے رابطہ قائم کرنے کیلئے مشترکہ فزیبلٹی اسٹڈی کی تجویز اور عوامی روابط کے مزید فروغ کیلئے تعلیمی اور ثقافتی تبادلے بڑھانے کی ضرورت پر بھی زور دیا گیا۔صدر مملکت نے مزید کہا کہ پاکستان 7ویں اعلیٰ سطحی سٹریٹجک کوآپریشن کونسل کے اجلاس میں ترک صدر رجب طیب اردگان کا خیرمقدم کرے گا۔
ملاقات میں صدر مملکت نے صدر ِپاکستان منتخب ہونے اور رمضان المبارک کے آغاز پر صدر اردگان کی جانب سے مبارکباد کے پیغامات پر شکریہ ادا کرتے ہوئے انکی مستقبل میں کامیابی کے لیے نیک خواہشات کا اظہار بھی کیا۔
