لاہور 18 اپریل ( اے پی پی ) وزیر تعلیم پنجاب رانا سکندر حیات نے کہا ہے کہ اگلے سال سے جنوری تک کتب کی پرنٹنگ اور فروری تک تقسیم کا مرحلہ مکمل کیا جائے گا۔ ڈسٹرکٹ ایجوکیشن اتھارٹی کا کردار ریوائز کرنے پر غور کر رہے ہیں۔پڑھا لکھا پنجاب اور بڑھے گا پنجاب جیسے تعلیمی تجربات سے استفادہ کیا جائے گا۔ بوٹی مافیا کے خلاف اقدامات کی ضرورت ایک عرصہ سے محسوس کی جا رہی تھی۔
ان خیالات کا اظہار انہوں نے سابق وزیر تعلیم میان عمران مسعود سے ملاقات کے دوران گفتگو کرتے ہوئے کیا۔ملاقات میں دونوں راہنماؤں کے درمیان صوبے کے تعلیمی مسائل اور چیلنجز پر تفصیلی تبادلہ خیال کیا گیا اور تعلیمی چیلنجز کے احاطہ کیلئے بیشتر امور پر مشاورت کی گئی۔
عمران مسعود نے بوٹی مافیا کے خلاف آپریشن پر وزیر تعلیم کو سراہا اور تعلیمی ریفارمز کے حوالے سے بھی رانا سکندر حیات کے ویژن کی تعریف کی۔ وزیر تعلیم اور عمران مسعود مابین نجی تعلیمی اداروں کے مسائل کے حوالے سے کمیٹی بنانے پر اتفاق ہوا ۔
ملاقات میں سنگل نیشنل کریکلم، نصابی کتب کی تاخیر کے معاملے پر سیر حاصل گفتگو کی گئی۔وزیر تعلیم نے کہا کہ عمران مسعود کے تعلیمی تجربات سے استفادہ کرتے ہوئے تعلیمی چیلنجز کا احاطہ کریں گے۔ عمران مسعود نے اپنے دور میں ریکارڈ تعلیمی اقدامات کئے۔ تعلیمی ریفارمز کی تیاری میں مشاورت سے آگے بڑھ رہے ہیں۔انہوں نے کہا کہ تعلیمی مافیا کو من مانی نہیں کرنے دی جائے گی، گھیرا تنگ کر رہے ہیں۔ نصاب کو جدید خطوط پر استوار کرنے کیلئے جلد ورکنگ مکمل کر لی جائے گی۔ آئندہ سال تعلیمی ایمرجنسی کے تناظر میں نہایت اہمیت کا حامل ثابت ہوگا۔
