اسلام آباد،22اپریل(اے پی پی):حجاج کرام کو امسال بہترین سہولتوں کی فراہمی کیلئے وزارت مذہبی امور نے متعدد نئے اقدام لیے گئے جبکہ ملک بھر میں ملٹی میڈیا پریزنٹیشن کے ذریعے عازمین حج کی جامع تربیت کا دوسرا مرحلہ اختتامی مراحل کی جانب گامزن ہے۔
حج تربیتی ورکشاپس میں بتایا گیا ہے کہ تمام سرکاری عازمین حج کو روانگی سے قبل دو بیگ، سکارف، احرام بیلٹ، شوز بیگ اور ڈیٹا سم دی جائے گی اس کے علاوہ تمام سرکاری عازمین حج کو مشائر ٹرین کی سہولت ملنے کا عندیہ دیا گیا ہے ۔
مدینہ منورہ میں تمام حجاج کو مسجد نبوی ﷺ کے نزدیک مرکزیہ میں رہائش فراہم کی جائے گی۔ بہترین معاونین حج کے انتخاب کیلیے امسال پہلی مرتبہ ایک ٹیسٹنگ سروس کی خدمات حاصل کی گئیں۔
معاونینِ حج کے انتخاب میں شفافیت کیلئے ٹیسٹنگ سروس کے ذریعے امتحانات لیے گئے۔ ڈاکٹرز اور طبی عملہ کی تعیناتی کیلئے بھی ٹیسٹنگ سروس کی خدمات حاصل کی گئیں۔
معاونینِ حجاج کی 550 سیٹوں کیلئے 47 ہزار امیدوار تحریری امتحان میں شریک ہوئے۔ حج میڈیکل مشن کی 400 سیٹوں کیلئے 9 ہزار ڈاکٹرز اور پیرامیڈیکل سٹاف نے تحریری امتحان دیا۔
ترجمان مذہبی امور کے مطابق علاقائی کوٹہ اور کیٹگری کے لحاظ سے میرٹ پر تقرری کو یقینی بنایا گیا۔ حج پالیسی کے مطابق سول اور یونیفارم افسران اور عملہ کے نئے اور تجربہ کار معاونین کا الگ میرٹ رکھا گیا۔
انتخاب کیلئے امیدواروں کے نفسیاتی رجحان، بنیادی ذہانت ، حج / آئی ٹی معلومات اور جسمانی فٹنس کے الگ نمبر رکھے گئے۔ اعلی عدالتوں میں وزارت کے نئے اقدام کے خلاف دائر پٹیشن خارج کر دی گئیں۔
