لاہور، 24 اپریل ( اے پی پی):20ہزار بائیکس فراہمی پراجیکٹ پر کام تیز کرنے کے حوالے سے صوبائی وزیر ٹرانسپورٹ بلال اکبر خان کی زیر نگرانی ٹرانسپورٹ ہائوس میں اجلاس ہوا۔اجلاس میں سٹوڈنٹس کی بڑی تعداد میں سکیم میں دلچسپی لینے پر اظہار اطمینان کیا وزیر ٹرانسپورٹ بلال اکبر خان نے آخری تاریخ سے قبل سٹوڈنٹس کیلئے تمام اضلاع میں روڈ شوز کرنے پر زور دیا اور کہا کہ سٹوڈنٹس کی سکیم میں دلچسپی بڑھانے کیلئے ان کے درست راہنمائی بہت ضروری ہے۔ بہت سے اسٹوڈنٹس سکیم میں اپلائی کرنا چاہتے ہیں مگر ان کے پاس درست معلومات نہیں۔
انہوں نے کہا کہ یونیورسٹیز سمیت تمام اہم مقامات پر روڈ شوز سے سکیم میں اپلائی کرنے والوں کی تعداد کئی گنا بڑھ جائیگی۔ اب تک کی کاوشوں سے بائیکس لینے کے خواہشمند افراد کی تعداد روز بروز بڑھ رہی ہے۔ بائیکس سکیم کے ضمن میں فیصل آباد کا دورہ بہت کامیاب رہا، سٹوڈنٹس کی دلچسپی غیر معمولی ہے۔
وزیر ٹرانسپورٹ نے کہا کہ ہمارا پہلا مقصد اپنے سٹوڈنٹس کو آسان اور سستی سفری سہولت فراہم کرنا ہے۔ اگلے مرحلوں میں سٹوڈنٹس کے علاوہ دیگر شعبہ ہائے زندگی سے تعلق رکھنے والوں کو بھی سکیم میں شامل کریں گے ۔ سکیم کو کامیاب بنانے کیلئے میں خود بھی مختلف اضلاع اور یونیورسٹیز کے دورے کر رہا ہوں۔ انہوں نے کہا کہ بائیکس سکیم وزیر اعلیٰ پنجاب مریم نواز شریف کی سالوں یاد رکھی جانے والی ایک کاوش ہے۔ سٹوڈنٹس کیلئے بائیکس محض ایک سکیم نہیں بلکہ خدمت ہے جو ہم کرتے رہیں گے۔
