لاہور،25اپریل(اے پی پی): وزیر اعلیٰ پنجاب مریم نواز شریف نے کہا ہے کہ پنجاب میں سماج دشمن اور جرائم پیشہ عناصر کے لئے اب کوئی جگہ نہیں،کچے میں پوری قوت سے گینگ کا خاتمہ کیا جائے گا،کچے کے ڈاکوؤں کے لئے کوئی رحم اور نرمی نہیں برتی جائے گی جبکہ کچے کے علاقے میں آپریشن کے لئے جدید ترین آلات اور اسلحہ دیں گے۔
ان خیالات کا اظہار وزیراعلی پنجاب مریم نوازشریف نے پولیس ٹریننگ کالج چوہنگ کمیٹی روم میں اجلاس کی صدارت کرتے ہوئے کیا ، اجلاس میں امن وامان سے متعلق امور کا جائزہ لیا گیا۔وزیر اعلیٰ پنجاب مریم نواز شریف کو آئی جی پنجاب نے صوبے بھر میں امن وامان کی صورتحال کے بارے میں تفصیلی بریفنگ دی اور پولیس، پراسیکیوشن میں بہتری کے لئے اقدامات پر پیش رفت کا بھی جائزہ لیا گیا ۔
مریم نواز شریف نے مزید کہا کہ پولیس کو پورے وسائل مہیا کریں گے، کرائم کو ہر صورت میں ختم کرنا ہے۔ انہوں نے کہا کہ اہم پوسٹنگ صرف ایماندار اور بہادر پولیس افسروں کو دی جائے جبکہ پولیس کی تھرڈ پارٹی مانیٹرنگ کے لئے خصوصی سیل بنایا جائے گااور پڑھے لکھے نئے نوجوانوں کو انویسٹی گیشن آفیسر لگایا جائے گا۔
مریم نواز شریف نے کہا کہ منشیات پر زیروٹالرنس ہے،سپیشل فورس بھی بنائیں گے۔منشیات کے لین دین میں ملوث ہرچھوٹے بڑے شخص پر بلا جھجک ہاتھ ڈالیں گے ۔بچے کے منشیات کا عادی ہونے پر والدین پر کیاگزرتی ہو گی۔
مریم نواز شریف نے مزید کہا کہ پنجاب میں سماج دشمن عناصر کی نشاندہی کے لئے کومبنگ آپریشن جاری رکھا جائے۔کیمروں سے ڈیجیٹل مانیٹرنگ کا دائرہ کار پورے لاہور تک وسیع کیا جائے۔قوانین کے نفاذ میں کمی نہیں برداشت کی جائے گی۔
سینئر صوبائی وزیر مریم اورنگزیب، وزیر اطلاعات عظمیٰ زاہد بخاری،ایم پی اے ثانیہ عاشق، چیف سیکرٹری، ہوم سیکرٹری، آئی جی,ایڈیشنل آئی جی اور دیگر حکام نے اجلاس میں شرکت کی۔
