کوئٹہ، 29 اپریل (اے پی پی):وزیر اعلی بلوچستان میر سرفراز بگٹی نے کہا ہے کہ پرامن بلوچستان مستحکم پاکستان کا ضامن ہے،دہشت گردی کے خلاف لڑائی فوج اور سرمچاروں کی نہیں ہم سب کی ہے، معصوم افراد کے قاتل کسی رعایت کے مستحق نہیں۔
ان خیالات کا اظہار وزیر اعلی نے ایپکس کمیٹی کے 16ویں اجلاس کی صدارت کرتے ہوئے کیا۔وزیر اعلی نے کہا کہ جس نے بندوق اٹھائی ہے اس سے سختی سے نمٹیں گے جو بلوچستانی ناراض ہے اس کے گھر جائیں گے۔ انہوں نے کہا کہ بہتر طرز حکمرانی کے لئے مثبت سمت کا تعین کررہے ہیں،گڈ گورننس کے ثمرات پانچ سے چھ ماہ میں عوام تک پہنچنا شروع ہو جائیں گے۔ وزیر اعلی بلوچستان نے کہا کہ صوبے کی بہتری کیلئے سب نے اپنا کردار ادا کرنا ہے۔
اجلاس میں کور کمانڈر بلوچستان کور لیفٹیننٹ جنرل راحت نسیم احمد خان اور دیگر اعلیٰ سول و عسکری حکام شریک سمیت صوبائی وزیر داخلہ میر ضیاء لانگو، چیف سیکرٹری بلوچستان، ایڈیشنل چیف سیکرٹری داخلہ آئی جی پولیس، چیف کلکٹر کسٹم نے شرکت کی۔
اجلاس میں امن وامان کی بہتری، اسمگلنگ کے خاتمے، غیر قانونی تارکین وطن کی واپسی، سمیت اہم فیصلے کئے گئے۔ اپیکس کمیٹی کے اجلاس میں سی پیک منصوبوں اور چائنیز کی فول پروف سیکورٹی کو موثر بنانے کے لئے مروجہ ایس او پیز پر سختی سے عمل درآمد کا فیصلہ، اپیکس کمیٹی کے اجلاس میں انسداد اسمگلنگ کارروائیوں کو موثر و تیز کرتے ہوئے چینی ، کھاد، پیٹرول و ڈیزل کی دو طرفہ اسمگلنگ ،بارڈر ایریا سے نان کسٹم پیڈ گاڑیوں کی پاکستان اسمگنگ روکنے کیلئے نتیجہ خیز اقدامات اٹھانے کا فیصلہ کیا گیا۔
ایپکس کمیٹی کے اجلاس میں بلوچستان سے واپس بھجوائے جانے والے غیر قانونی تارکین وطن کے اعداد و شمار پیش کئے گئے۔
