پشاور،01 مئی (اے پی پی):وزیراعلیٰ خیبرپختونخوا علی امین گنڈاپور نے صوبائی حکومت کی طرف سے مزدوروں کو ملنے والے پیکجز کو دگنا کرنے کا اعلان کرتے ہوئے مزدوروں کے بچوں کے تعلیمی اخراجات کےلئے 17 کروڑ 75 لاکھ روپے کی رقم بٹن دبا کر بینک آف خیبر کو آن لائن ٹرانسفر کردی۔
عالمی یوم مزدور کی مناسبت سے تقریب سے خطاب کرتے ہوئے وزیراعلی خیبر پختونخوا علی امین گنڈاپور نے کہا کہ محکمہ کی آمدن دگنا ہوگئی ہے، اس لئے مزدوروں کے پیکجز بھی دوگنے ہونے چاہئیں۔وزیراعلی نے حکومت کی طرف سے مقرر کردہ کم سے کم اجرت پر عملدرآمد یقینی بنانے کا اعلان کرتے ہوئے کہا کہ کم سے کم اجرت پر عملدرآمد یقینی بنانے کےلئے ویج مجسٹریٹ تعینات کئے جائیں گے۔انہوں نے کہا کہ تمام مزدوروں کے بینک اکائونٹس بنا کر ان کی اجرت ان کے اکائونٹس میں ٹرانسفر کی جائے، اگر مزدور کی کم سے کم ماہانہ اجرت 32 ہزار روپے ہے تو مزدور کو اتنی ہی ملنی چاہیے۔
وزیراعلیٰ نے پشاور میں مزدوروں کےلئے تعمیر کئے گئے 2056 فلیٹس جلد مزدوروں کو حوالے کرنے کی ہدایت کی اور کہا کہ مزدور تنظیموں کی مشاورت سے یہ فلیٹس شفاف طریقے سے تقسیم کئے جائیں۔ وزیر اعلیٰ نے مزدوروں کے بچوں کے تعلیمی اخراجات کے لئے 17 کروڑ 75 لاکھ روپے کی رقم بٹن دبا کر بینک آف خیبر کو آن لائن ٹرانسفر کردی۔
وزیراعلی نے کہا کہ ملک کی تعمیر و ترقی میں مزدوروں کے کردار کا اعتراف کرتا ہوں، محنت کش طبقے کی قربانیوں کو خراج تحسین پیش کرتا ہوں، اگر مزدوروں کے مسائل کا احساس کرنا شروع کرینگے تو ان کےمسائل خود بخود حل ہو جائیں گے، ملکی معیشت میں محنت کش طبقہ ریڑھ کی ہڈی کی حیثیت رکھتا ہے، محنت کش طبقے کے خون اور آنسو کا احساس ہو تو ان کے 90 فیصد مسائل خود حل ہوجائیں گے۔
وزیراعلی نے کہا کہ جو شعبے پیچھے رہ گئے ہیں ان کو ترقی دینی ہے، ایسے شعبوں کو ترقی دینے کے لئے قانون سازی اور اصلاحات کرینگے۔انہوں نے کہا کہ سرمایہ کاری کو فروغ دینے کے لئے ایز آف ڈوئینگ بزنس ہماری ترجیح ہے، سرمایہ کاروں کی حوصلہ افزائی کے لئے تمام سہولیات فراہم کی جائیں گی، سرمایہ داروں کی حوصلہ افزائی کی جارہی، انہیں تحفظ فراہم کر رہے ہیں۔انہوں نے کہا کہ محنت کش طبقے کے حقوق کا تحفظ یقینی بنائیں گے۔انہوں نے کہا کہ ہم نے مسائل کا حل نکالنا ہے اور حل تبھی نکلے گا جب نیت اور ترجیحات درست ہوں، ہم صنعت کاروں کو بھی سہولیات دینے کے لئے اقدامات کر رہے ہیں، صنعتوں کو کم قیمت پر بجلی فراہم کرنے کے لئے پلان بنا رہے ہیں، صنعتوں کو سہولیات دیں گے تو صنعتوں میں کام کرنے والے محنت کشوں کو بھی فائدہ ہو گا۔
