میانوالی ،15 مئی (اے پی پی ): وفاقی وزیرداخلہ محسن نقوی کی میانوالی کے علاقے مسلم کالونی میں میجر بابر خان شہید کی رہائش گاہ آمد، انہوں نے ایف سی بلوچستان نارتھ کے شہید میجر بابر خان کے والد نور خان ، بھائیوں کیپٹن ناصر اور سہیل خان سے ملاقات کی اورمیجر بابر خان کی شہادت پر اظہار تعزیت کیا۔
اس موقع پر وفاقی وزیرداخلہ محسن نقوی نے شہید میجر بابر خان کے والد نور خان کے بلند حوصلوں کو سراہا۔انہوں نے کہا کہ قوم کو آپ جیسے بلند حوصلہ والد پر فخر ہے،شہید میجر بابر خان جیسے دلیر بیٹے کے والد کو پوری قوم کا سلام ہے۔انہوں نے شہید کے والد کے متعلق کہا کہ آپ جیسے والد کا حوصلہ دیکھ کر ہمارا سر فخر سے بلند ہو گیاہے۔شہید میجر بابرخان کے والد کا حوصلہ پاک دھرتی کے مضبوط وجود کی علامت ہے۔
وفاقی وزیر نے کہا کہ ہمارا ایمان ہے کہ شہید ہمیشہ زندہ رہتے ہیں اور شہید میجر بابر خان بھی ہمارے دلوں میں زندہ ہیں اور زندہ رہیں گے۔انہوں نے کہا کہ جس قوم کے پاس شہید میجر بابر خان جیسے بہادر سپوت ہوں، اسے دشمن کبھی شکست نہیں دے سکتا۔ انہوں نے اس عزم کا اظہار کیا کہ دہشتگردوں اور ان کے سہولت کاروں کے خلاف آپریشن پوری طاقت سے جاری رہے گا۔
وفاقی وزیرداخلہ محسن نقوی نے بلوچستان میں دہشتگردوں کے خلاف آپریشن میں شہید ہونے والے میجر بابر خان کے درجات کی بلندی کے لئے اور ان کے اہل خانہ کے لئے صبر جمیل کی دعا کی ۔وزیرداخلہ نے دہشتگردوں کو جہنم واصل کرنے پر شہید میجر بابر خان کی جرات کو خراج عقیدت پیش کیا۔
اس موقع پر فرنٹیئر کور خیبرپختونخوا ساوتھ کے بریگیڈئر عامر، ڈپٹی کمشنر میانوالی، ڈی پی او میانوالی اور اعلیٰ سول و عسکری حکام بھی اس موقع پر موجود تھے۔
