اسلام آباد،15 مئی (اے پی پی ): وزیراعظم محمد شہبازشریف نے کہا ہے کہ پبلک سیکٹر ڈویلپمنٹ پروگرام میں ایسے منصوبے لائے جائیں جس سے ملک کی پائیدار ترقی ممکن ہو سکے گی۔
ان خیالات کا اظہار انہوں نے وزارت منصوبہ بندی اور پبلک پرائیویٹ پارٹنرشپ اتھارٹی کے امور پر اہم اجلاس کی صدارت کرتے ہوئے کیا۔وزیراعظم نے کہا کہ پبلک سیکٹر ڈویلپمنٹ پروگرام میں ایسے منصوبے لائے جائیں جس سے ملک کی پائیدار ترقی ممکن ہو سکے گی۔
وزیراعظم نے تمام بڑے قومی منصوبوں کی تھرڈ پارٹی ویلیڈیشن اور ترقیاتی بجٹ اور پی ایس ڈی پی کے حوالے سے کابینہ کمیٹی تشکیل دینے کی ہدایت کی، یہ کمیٹی پی ایس ڈی پی پروگرام کے کیلئے لائحہء عمل تشکیل دینے کے حوالے سے قلیل مدتی، وسط مدتی اور طویل مدتی تجاویز مرتب کرے گی۔
وزیراعظم نے پی ایس ڈی پی پروگرامز اور صوبوں کے سالانہ ترقیاتی پروگرام کے حوالے سے وفاقی اور صوبوں میں ہم آہنگی اور روابط بہتر بنانے، جبکہ وفاقی وزارتوں کو پبلک پرائیویٹ پارٹنرشپ منصوبوں کے حوالے سے بھی تجاویز پیش کرنے کی ہدایت کی۔
اجلاس میں وفاقی وزیر منصوبہ بندی احسن اقبال ، وفاقی وزیر خزانہ و محصولات محمد اورنگزیب ،وفاقی وزیر اقتصادی امور احد خان چیمہ ، وزیر پیٹرولیم مصدق ملک، ڈپٹی چیئرمین پلاننگ کمیشن جہانزیب خان، وزیراعظم کے کوآرڈینیٹر رانا احسان افضل اور متعلقہ اعلیٰ سرکاری افسران نے شرکت کی ۔
