نظام میں شفافیت اور مریضوں کی آسانی کیلئے تمام ہسپتالوں میں اسی نوعیت کے سوفٹ ویئرز کی اشد ضرورت ہے خواجہ سلمان رفیق

لاہور، 16 مئی(اے پی پی) صوبائی وزیر صحت خواجہ سلمان رفیق نے میئو ہسپتال میں سٹور مینجمنٹ سسٹم کا افتتاح کر دیا۔اس موقع پر وائس چانسلر کنگ ایڈورڈ میڈیکل یونیورسٹی پروفیسر محمود ایاز، سی ای او پروفیسر احسن نعمان، ایم ایس میئو ہسپتال پروفیسر فیصل مسعود، پروفیسر ابرار اشرف، پروفیسر معین، ڈاکٹر سلمان کاظمی و دیگر فیکلٹی ممبران اور ڈاکٹرز کی کثیر تعداد نے شرکت کی۔صوبائی وزیر صحت خواجہ سلمان رفیق نے تقریب کے شرکاء سے خطاب کرتے ہوئے کہا کہ میئو ہسپتال میں سٹور مینجمنٹ سسٹم کیلئے جدید سوفٹ ویئر کی لانچنگ پر میئو ہسپتال کی انتظامیہ کو شاباش اور مبارکباد دیتا ہوں۔ نظام میں شفافیت اور مریضوں کی آسانی کیلئے تمام ہسپتالوں میں اسی نوعیت کے سوفٹ ویئرز کی اشد ضرورت ہے۔ خواجہ سلمان رفیق نے کہا کہ باقی ہسپتالوں میں بھی اس سوفٹ ویئر سے استفادہ کیا جائے گا۔ سٹور مینجمنٹ سسٹم کے ذریعے ہمیں ادویات کا موجودہ سٹاک، فراہم کی جانے والی ادویات، پرچیز آرڈر و دیگر معلومات حاصل ہوں گی۔ خواجہ سلمان رفیق نے کہا کہ اس سوفٹ ویئر کے بعد مینیئول کام اور ایچ آر کی بچت ہو جائے گی۔ سٹور مینجمنٹ سسٹم ایک ریئل ٹائم سوفٹ ویئر ہے۔ ہمیں اسی نوعیت کے اقدامات کے ذریعے نظام میں شفافیت لانی ہوگی۔ خواجہ سلمان رفیق نے کہا کہ 2012 میں ہماری حکومت نے سرکاری ہسپتالوں میں فارماسسٹ بھرتی کرنے کے اصولی اقدامات اٹھائے تھے۔ الحمدللہ پنجاب کے مختلف ہسپتالوں میں سو فیصد میرٹ پر پرنسپلز اور ایم ایس حضرات کی تعیناتی کی ہے۔ آج میئو ہسپتال میں سٹور مینجمنٹ سسٹم کیلئے خدمات سر انجام دینے والے ڈاکٹرز کو خراجِ تحسین پیش کرتے ہیں۔ انشاء اللہ اس ریئل ٹائم سوفٹ ویئر سے نا صرف میئو ہسپتال بلکہ پورے صوبے کو فائدہ ہوگا۔