لاہور، 22 مئی(اے پی پی): صوبائی وزیر صنعت و تجارت چوہدری شافع حسین نے کہا کہ ایس ایم ایز کو قومی معیشت میں ریڑھ کی ہڈی کی حیثیت حاصل ہے۔
ان خیالات کا اظہار انہوں نے بورڈ آف مینجمنٹ سمال انڈسٹریل اسٹیٹ سرگودھا کے وفد سے ملاقات میں کیا۔ملاقات کے دوران سمال انڈسٹریل اسٹیٹ سرگودھا کے ترقیاتی مسائل پر بات چیت کی گئی۔وفد نے سمال انڈسٹریل اسٹیٹ میں روڈ انفراسٹرکچر اور دیگر صنعتی انفراسٹرکچر بہتر بنانے کا مطالبہ کیا۔صوبائی وزیر نے سمال انڈسٹریل اسٹیٹ سرگودھا کے ترقیاتی مسائل کے حل کی یقین دہانی کروائی۔صوبائی وزیر صنعت و تجارت چوہدری شافع حسین نے کہا کہ ایس ایم ایز کو قومی معیشت میں ریڑھ کی ہڈی کی حیثیت حاصل ہے۔ چھوٹی اور درمیانے درجے کی صنعتوں کے فروغ کیلئے حکومت ہر ممکن معاونت کرے گی۔
چوہدری شافع حسین نے کہا کہ انڈسٹریل اسٹیٹس کے حوالے سے نئی پالیسی لا رہے ہیں اور کہا کہ انڈسٹریل اسٹیٹس کے بورڈز آف مینجمنٹ بھی تبدیل کئے جا رہے ہیں،پیڈمک، فیڈمک سمیت دیگر صنعتی مراکز کے بورڈز میں مخلص، بہترین اور محنتی پروفیشنلز شامل کئے جائیں گے،انڈسٹریل اسٹیٹس کی سوفیصد آبادکاری یقینی بنائیں گے اورصنعتی مراکز میں پراپرٹی کا کاروبار کسی صورت نہیں ہونے دیں گے۔ چوہدری شافع حسین نے کہا کہ انڈسٹریل اسٹیٹس میں حاصل کئے گئے پلاٹ پر 2سال میں ہرصورت کارخانہ لگانا ہوگا۔ کارخانہ نہ لگانے کی صورت میں پلاٹ منسوخ ہوگا۔ بورڈ آف مینجمنٹ سمال انڈسٹریل اسٹیٹ سرگودھاکے صدر محمد افتخار، ایم ڈی پیسک سدرہ یونس اور متعلقہ افسران بھی ملاقات میں موجود تھے۔
