اسلام آباد،23 مئی (اے پی پی ):وفاقی وزیر منصوبہ بندی ، ترقی اور خصوصی اقدامات احسن اقبال نے کہا ہے کہ میکرو اکنامک استحکام اسی وقت آسکتا ہے جب برآمدات پر توجہ دی جائے اس کے لیے ضرورت ہے کہ پاکستان کی آٹوموبائل انڈسٹری ملکی برآمدات بڑھانے کے لیے روڈ میپ تیار کرے۔
ان خیالات کا اظہار انہوں نے آج جاپانی کمپنی سوزوکی کے وفد سے ملاقات کے دوران کیا ۔وفد میں گلوبل وائس پریذیڈنٹ، ایشیا ہیڈ، سی ای او اور ایم ڈی سوزوکی پاکستان شامل تھے۔
احسن اقبال کا کہنا تھا کہ مجھے وہ وقت یاد ہے جب دنیا میں سب سے زیادہ سٹیل ملز جاپان میں ہوا کرتی تھیں اور جاپان سے بہتر کوئی نہیں جانتا کہ عالمی سطح پر مسابقتی برآمدات کو کیسے فروغ دیا جائے
اس موقع پر سوزوکی کے وفد نے پاکستان میں اپنے ایندھن کی پیداواری یونٹ کے لیے حکومت سے تعاون طلب کیا اور کہا کہ سوزوکی پاکستان کے نئے پلانٹ کے ذریعے گرین انرجی کو فروغ ملے گا۔ انہوں نے کہا کہ ہم پاکستانی مارکیٹ کی صلاحیت پر یقین رکھتے ہیں اور پاکستان میں ترقی کے مواقع کو مسلسل تلاش کر رہے ہیں۔
