لاہور؛ 25 مئی (اے پی پی): وزیراعلی مریم نواز شریف کی قائم کردہ کمیٹی کا سول سیکرٹریٹ میں اجلاس منعقد ہوا۔وزیر بلدیات ذیشان رفیق کی زیرصدارت اجلاس میں لوکل گورنمنٹ بل کی تیاری پر غور کیا گیا۔اجلاس میں بلدیاتی اداروں میں مخصوص نشستوں پر انتخاب کی مختلف تجاویز کا جائزہ لیا گیا۔ذیشان رفیق نے گفتگو کرتے ہوئے کہا کہ ایسا قانون بنانا چاہتے ہیں جو دیرپا اور مستحکم بلدیاتی نظام کا ضامن ہو، کمیٹی اپنی تجاویز اور سفارشات پنجاب کابینہ کو بھجوائے گی۔ وزیر بلدیات نے کہا کہ بااختیار مقامی حکومتوں کے قیام کے لئے موثر قانون سازی ضرروی ہے، اختیارات کی نچلی سطح پر منتقلی سے کئی مسائل حل ہو سکیں گے۔
