پنڈی بھٹیاں،30 مئی (اے پی پی ):ڈی جی فوڈ اتھارٹی کی ہدایت پر فوڈ سیفٹی ٹیموں نے پنڈی بھٹیاں شہر اور گردونواح میں واقع فوڈ یونٹس پر چھاپےاور علی الصبح اس سلسلہ میں مختلف مقامات پر ناکہ بندی کی گئی، ناکہ بندی کے دوران 2 ہزار لیٹر ملاوٹی دودھ،1600لٹر فلیورڈ ڈرنکس، بیورجز اور غیر منظور شدہ لیبل تلف کر کے شہریوں کی زندگیوں سے کھیلنے والوں کے خلاف مقدمہ درج کروا دیا گیا۔
اس موقع پر کیے گئے ٹیسٹ مقرر کردہ معیار کے منافی پائے گئے ،فوڈ سیفٹی ٹیم کے مطابق قلفیوں کے لیبل غیر منظورشدہ، تاریخ اجراء اور تنسیخ عدم موجود پائی گئی۔برف کی قلفیوں میں نان ٹریس ایبل، ممنوعہ اجزاء کا استعمال کیا جارہا تھا، ایکسپائر جوس فروخت کے لیے تیار رکھے پائے گئے، بروقت کارروائی کر کے شہریوں اور بچوں کو موزی امراض سے بچا لیا گیاہے، فوڈ سیفٹی ٹیموں کے مطابق ملاوٹی دودھ کوپنڈی بھٹیاں سے سٹی ایریا میں موجود دکانوں پر سپلائی کیا جانا تھا۔
ڈی جی فوڈ اتھارٹی عاصم جاوید کے مطابق کاربونیٹڈ ڈرنکس کا استعمال شہریوں کو ہڈیوں کی کمزوری اور شوگر جیسی دیگر بیماریوں میں مبتلا کرسکتا ہے۔انہوں نے کہا کہ وزیر خوراک پنجاب کی ہدایت پر جعلسازی کا گھناؤنا دھندہ کرنے والوں کا کاروبار جڑ سے اکھاڑ دیا جائے گا۔
