لاہور، 31 مئی(اے پی پی): وزیراعلیٰ پنجاب مریم نواز سے پاکستان میں اقوام متحدہ کے ریزیڈنٹ اینڈ ہیومینٹیرین کوآرڈینیٹر محمد یحییٰ کی قیادت میں 22 رکنی وفد نے ملاقات کی جس میں مختلف شعبوں میں اشتراک کار مزید بڑھانے پر اتفاق کیا گیا۔
وفد میں یو این کے ذیلی اداروں کے مقامی سربراہ شامل تھے۔ ملاقات میں تعلیم، صحت، زراعت اور دیگر شعبوں میں اشتراک کار مزید بڑھانے پر اتفاق کیا گیا، اقوام متحدہ کے اداروں کے تعاون سے جاری ترقیاتی منصوبوں پر بھی تبادلہ خیال ہوا، وزیر اعلیٰ مریم نواز نے وفد کو ایجوکیشن، ہیلتھ سیکٹر ریفارمز اور حکومتی پالیسی سے متعلق آگاہ کیا۔
اس موقع پر مریم نواز کا کہنا تھا کہ پنجاب کی زراعت میں پاکستان کی اکانومی کو تبدیل کرنے کا پورا پوٹینشل موجود ہے، ہر سیکٹر میں بہتری اور اصلاحات میری ترجیحات میں شامل ہیں، ہر عوامی مسئلہ اور معاملہ ترجیحی بنیادوں پر حل کرنے کیلئے کوشاں ہوں۔
انہوں نے کہا کہ اصلاحات کے ثمرات سے لوگ جلد مستفید ہوں گے، سروس ڈلیوری اور گڈ گورننس کیلئے پہلی مرتبہ افسروں کی گریڈنگ کا سسٹم رائج کیا جا رہا ہے، یو این کے اداروں کے اشتراک سے ایک لاکھ گھروں کی تعمیر کا ہدف بھی پورا کریں گے۔
مریم نواز نے کہا کہ کہ رکاوٹوں کے باوجود وزیراعلیٰ بننا اعزاز سمجھتی ہوں، محروم معیشت اور غریب افراد کو دیکھ کر مالی طور پر مضبوط کرنے کا سوچتی رہتی ہوں، پنجاب کی ہر خاتون کو مالی طور پر خود مختار اور خوشحال دیکھنا چاہتی ہوں، اقوام متحدہ کے پراجیکٹ اور ہماری ترجیحات کا مشترکہ محور عوام کی خدمت ہے۔
وزیراعلیٰ پنجاب کا کہنا تھا کہ پنجاب میں ٹیکس فری گارمنٹس سٹی بنا رہے ہیں جہاں خواتین کو 6 ماہ مفت ٹریننگ اور سکالر شپ بھی دیں گے، پنجاب کے ہر شہر میں پہلی بار ویسٹ مینجمنٹ کا بہترین نظام لا رہے ہیں، نوازشریف آئی ٹی سی کو پاکستان کی سیلی کان ویلی بنائیں گے۔ وزیر اعلیٰ پنجاب نے کہا کہ تمام اضلاع میں مکمل ہیلتھ سہولتوں کی فراہمی کا نظام وضع کررہے ہیں۔ پاکستان میں پہلی مرتبہ ایئر ایمبولینس سروس کاآغاز پنجاب سے ہوگا۔
مریم نوازشریف نے کہا کہ لاہور میں پہلا پبلک سیکٹر کینسر ہسپتال بنا رہے ہیں۔ 2500بنیادی مراکز صحت،300دیہی مراکز صحت اور بڑے ہسپتالوں کی ری ویمپنگ کررہے ہیں۔
وزیر اعلیٰ پنجاب نے بتایا کہ مہلک امراض میں مبتلا شہریوں کو دو ماہ کے لئے مفت دوائیاں گھر کی دہلیز پر پہنچائی جارہی ہیں۔بچوں کی نیوٹریشن کیلئے سکولوں میں فری میل دیا جارہا ہے۔
مریم نوازشریف نے کہا کہ چھوٹے کسانوں کو بلا سود قرضے اورمشینری بھی دیں گے۔ لائیوسٹاک کے فروغ کیلئے دیہات میں فارمز کی معاونت کریں گے۔ انھوں نے کہا کہ صنفی تفاوت کے خاتمے کیلئے کوشاں ہیں، خواتین کے لئے پہلا ورچوئل پولیس سٹیشن قائم کردیا ہے۔
وزیر اعلیٰ پنجاب نے کہا کہ لاہور ہی نہیں پنجاب کے ہر شہر کی ترقی میری ترجیحات میں شامل ہے۔ محمد یحییٰ سربراہ یواین ٹیم نے کہا کہ لاہور دیکھنے کا اشتیاق تھا،پنجاب کے لوگ متاثر کن ہیں۔ عوام کی خدمت کے مشن میں حکومت پنجاب کی بھر پور معاونت کریں گے۔ نمائندہ یو این ڈی پی سمیوئیل نے کہا کہ پاکستان بالخصوص پنجاب کے فلاحی پراجیکٹ قابل تحسین ہے۔ سینیٹر پرویز رشید،چیف سیکرٹری زاہد زمان اختربھی موجود تھے۔
