لاہور، 5جون(اے پی پی): صوبائی وزیر صنعت و تجارت چوہدری شافع حسین سے چین کی سکلز ایجوکیشن کمپنی یو این آئی انٹرنیشنل کے سی ای او مسٹر میکس ما نے ملاقات کی۔ پنجاب سرمایہ کاری بورڈ میں ہونے والی ملاقات کے دوران ٹیکنیکل ایجوکیشن کے فروغ اور ہنرمند افرادی قوت کی تیاری میں تعاون پر اتفاق کیا گیا جس کا مقصد ٹیوٹا اور یو این آئی انٹرنیشنل کے مابین جلد معاہدہ کرنا ہے۔
چوہدری شافع حسین نے گفتگو کرتے ہوئے کہا کہ عالمی مارکیٹ میں ہنر مند افرادی قوت کی بہت ڈیمانڈ ہے۔ بدقسمتی سے ٹیوٹا کے ادارے عالمی معیار کے مطابق ہنرمند افرادی قوت تیار نہیں کررہے۔ انھوں نے کہا کہ ماضی میں ٹیوٹا کے اداروں کو اپ گریڈ کرنے پر توجہ نہیں دی گئی ۔
صوبائی وزیر نے کہا کہ موجودہ حکومت نے ٹیوٹا کے اداروں اور ان کی لیبز کوعالمی معیار کے مطابق بنانے کے لئے مرحلہ وار پروگرام شروع کیا ہے۔ پہلے مرحلے میں ٹیوٹا کے 6 کالجوں اور ان کی لیبز کو اپ گریڈ کیا جائے گا۔
صوبائی وزیر نے کہا کہ چین کی کمپنی یواین آئی انٹرنیشنل کے اس حوالے سے تعاون کا خیر مقدم کریں گے۔ ٹیوٹا کے اداروں میں پہلی بار سولر ٹیکنالوجی کے کورسز بھی متعارف کرائے جارہے ہیں۔ ملاقات میں تیانج یونیورسٹی آف ٹیکنالوجی میں چار سالہ ڈگری کورسز کے علاوہ 2سالہ کورسز شروع کرنے کا بھی جائزہ لیا جا رہا ہے۔ وزیر اعلیٰ پنجاب کی ہدایت پر نوجوانوں کو جدید علوم سے آراستہ کرنے کا انقلابی پروگرام شروع کیا گیا ہے۔
انہوں نے کہا کہ چیف منسٹر سکل ڈویلپمنٹ پروگرام کے تحت 3ماہ کے آئی ٹی کورسز مفت کرائے جارہے ہیں۔ پروگرام کے تحت ہرسال 4 ہزار بچے اور بچیوں کو شارٹ کورسز کرائے جائیں گے۔ کورسز کی تکمیل پر انٹرنیشنل سرٹیفیکیشن ہوگی۔
میکس ما نے گفتگو کرتے ہوئے کہا کہ ہمارا گروپ عالمی مارکیٹ اور چینی کمپنیوں کی ضرورت کے مطابق پاکستانی لیبر کو تربیت فراہم کرسکتا ہے، انھوں نے کہا کہ پنجاب حکومت کے ساتھ سکل ڈویلپمنٹ میں تعاون کیلئے تیار ہیں-
