ڈیرہ غازی خان، 07 جون (اے پی پی):ڈیرہ غازی خان ڈویژن میں ریونیو اہداف کے حصول میں ناکامی اور جان بوجھ کر ریونیو دستاویزات غائب کرنے والے ریونیو افسران کے خلاف کارروائی کے احکامات جاری کردئیے گئے ۔ افسران کے خلاف کارروائی کے احکامات کمشنر ڈاکٹر ناصر محمود بشیر کی زیر صدارت منعقدہ اجلاس میں جاری کیے گئے ۔انہوں نے کہا کہ غائب کی گئیں دستاویزات کی برآمدگی میں ناکامی پر پٹواریوں اور تحصیلداوں کو ملازمت سے فارغ کرنے سمیت دیگر قانونی کارروائی کی جائے گی اور ریونیو معاملات ،انتقالات اور دیگر ریونیو دستاویزات کی برآمدگی کےلئے ڈپٹی کمشنرز خود نگرانی کریں۔انہوں نے کہا کہ آبیانہ،مالیہ،زرعی انکم ٹیکس،سٹیمپ ڈیوٹی اور سرکاری واجبات کی سوفیصد وصولی یقینی بنائی جائے، اہداف کے حصول میں ناکامی پر ریونیو افسران سے حلقے بھی واپس لئے جاسکتے ہیں۔کمشنر نے گمشدہ رپورٹ ہونے والی 582 دستاویزات کی برآمدگی کےلئے ٹائم فریم بھی مقرر کردیا ۔اجلاس میں ڈپٹی کمشنرز،ایڈیشنل کمشنر ریونیو،اے ڈی سی آر،اسسٹنٹ کمشنرز اور ریونیو آفیسرز شریک تھے۔
