کوئٹہ، 07 جون (اے پی پی):وزیر اعلیٰ بلوچستان میر سرفراز بگٹی نے کہا ہے کہ سوشل میڈیا نے معاشرے میں جھوٹ اور سچ کی تمیز ختم کردی ہے جھوٹ پر مبنی بیانیہ کے ذریعے ریاست اور نوجوانوں میں خلیج پیدا کی گئی ترقی یافتہ معاشروں نے سماجی اور تعلیمی اصلاحات کے بعد سوشل میڈیا کو متعارف کرایا جبکہ پاکستان میں کسی بھی سماجی اقدار کی اصلاح کے بغیر سوشل میڈیا کو رسائی دی گئی جس کے باعث اخلاقی اقدار کو زک پہنچی ۔
ان خیالات کا اظہار انہوں نے جمعہ کو یہاں غیر سرکاری تنظیم وائس آف بلوچستان کے زیر اہتمام اساتذہ کی تقریب ”سفر معلم” سے خطاب کرتے ہوئے کیا وزیر اعلیٰ نے کہا کہ بلوچستان میں ننانوے فیصد مسائل گورننس کی وجہ سے ہیں ۔محدود وسائل بدعنوانی کی نظر ہوجاتے ہیں عوام تک ترقی کے ثمرات پہنچانے کے لئے پی ایس ڈی پی درست کرنے کی ضرورتٍ ہے ۔وزیر ا علیٰ نے کہا کہ بچوں کو معاشرتی تفریق سے قطع نظر تعلیم کے یکساں مواقع فراہم کرنا ضروری ہیں۔ بلوچستان میں فروغ تعلیم کے لئے بینظیر بھٹو اسکالرشپ پروگرام شروع کیا گیا ہے جس کے تحت ہر ضلع سے میٹرک میں ٹاپ کرنے والے دس بچیوں اور دس بچوں کے آئندہ سولہ سالہ تعلیمی اخراجات صوبائی حکومت برداشت کرے گی۔ سائنس کے مضامین میں پی ایچ ڈی کرنے والے بلوچستان کے طالب علموں کو دنیا بھر کی 200 اعلیٰ ترین جامعات میں اسکالرشپ فراہم کی جائے گی اس کے علاوہ اقلیتوں کو سالانہ ایک سو اسکالرشپ دیں گے ٹرانس جینڈر کو بھی اسکالرشپ پروگرام کا حصہ بنایا گیا ہے ۔متعارف کرائے گئے اسکالرشپ پروگرام میں فورسز کے ساتھ سویلین شہداءکے بچوں کے تعلیمی اخراجات بھی حکومت بلوچستان ادا کرے گی۔
وزیراعلیٰ بلوچستان نے کہا کہ اساتذہ کو مخلصی سے اپنے پیشہ وارانہ فرائض سرانجام دینے ہوں گے محنتی اور ڈیوٹی کے پابند معلمین کو خراج تحسین پیش کرتے ہیں جبکہ عادی غیر حاضر ٹیچرز کے خلاف تادیبی کارروائی ہوگی ٹیچنگ لازمی سروسز کا حصہ ہے ، اساتذہ ہڑتال اور احتجاج سے دور رہتے ہوئے درس و تدریس کو اولیت دیں ۔
وزیر اعلیٰ میر سرفراز بگٹی نے شرکاءکے مختلف سوالات کا جواب دیتے ہوئے کہا کہ تشدد سے بلوچستان کو حقوق نہیں مل سکتے اور نہ ملے ہیں بلوچستان کو جتنے بھی حقوق ملے پارلیمنٹ سے ملے اور آئندہ بھی حقوق کے حصول کا یہی راستہ ہے ۔وزیر اعلیٰ نے کہا کہ بلوچستان میں ہر سطح پر میرٹ کے فروغ کو یقینی بنائیں گے ۔صوبے میں کوئی نوکری نہیں بکے گی چاہے اس کے لئے مجھے کوئی بھی قربانی دینی پڑے، گڈ گورننس کا قیام تعلیم اور صحت کی ترقی و ترویج اور ماحولیات بہتری صوبائی حکومت کی پہلی ترجیحات میں شامل ہے۔
