لاہور 9جون(اے پی پی): صوبائی وزیر صنعت و تجارت چوہدری شافع حسین نے ایم ایم عالم روڑ پر ویمن ریسورس سینٹر کا دورہ کیا اور خواتین سرمایہ کاروں کو بزنس سکل بڑھانے کے حوالے سے دی جانے والی تربیت کا جائزہ لیا۔صوبائی وزیر صنعت و تجارت چوہدری شافع حسین نے گفتگو کرتے ہوئے کہا کہ خواتین انڈسٹری لگانا چاہیں تو سمال انڈسٹریل اسٹیٹس میں 8سال کی لیز پر زمین فراہم کی جا سکتی ہے۔انھوں نے کہا کہ خواتین سرمایہ کاروں کو مزید سہولتوں کی فراہمی کے لئے انڈسٹریل پالیسی میں تبدیلی کیلئے تیار ہیں۔ مصنوعات کی نمائش کے لئے پیسک ہاؤس میں ڈسپلے سینئر بناکر دیں گے تاکہ خواتین سرمایہ کار پنجاب روزگار سکیم سے فائدہ اٹھائیں۔صوبائی وزیر نے کہا کہ خواتین سرمایہ کاروں کیلئے پنجاب سرمایہ کاری بورڈ میں علیحدہ کاؤنٹر بھی بنایا جائے گا۔سرمایہ کاروں کی سہولت کیلئے پنجاب کے مختلف شہروں میں 6بزنس فسیلیٹیشن سینٹر بنائے گئے ہیں اور مزید چار شہروں میں بزنس فسیلیٹیشن سینٹر بنائے جارہے ہیں۔انھوں نے کہا کہ کسی بھی بزنس کے فروغ کیلئے ٹریننگ ضروری ہے۔صوبائی وزیر صنعت و تجارت نے کہا کہ ویمن ریسورس سینٹر بہترین کام کر رہا ہے، حکومت ادارے کو مکمل تعاون فراہم کرے گی۔
خواتین سرمایہ کار نے گفتگو کرتے ہوئے کہا کہ ویمن ریسورس سینٹر کی تربیت نے ہمیں کاروبار کا ڈھنگ سکھایا ہے، خواتین سرمایہ کاروں کی سہولت کیلئے ویمن ہب ہونا چاہیئے۔پراجیکٹ ڈائریکٹر نے صوبائی وزیر صنعت و تجارت کو ادارے کے تربیتی عمل بارے تفصیلی بریفنگ دی۔مینجنگ ڈائریکٹر پنجاب سمال انڈسٹریز کارپوریشن سدرہ یونس ،ڈاکٹر شہلا اور خواتین سرمایہ کار اس موقع پر موجود تھیں۔
