لاہور،10جون (اے پی پی):ریلیف کمشنر پنجاب نبیل جاوید کی زیر صدارت پیر کو یہاں کمیٹی روم میں پی ڈی ایم اے اقدامات بارے اجلاس ہوا ،اجلاس میں ڈی جی پی ڈی ایم اے عرفان علی کاٹھیا، سیکرٹری بورڈ آف ریونیو شفقت اللہ مشتاق اور دیگر افسران نے شرکت کی۔ڈی جی پی ڈی ایم اے نے ریلیف کمشنر نبیل جاوید کو مون سون کانٹیجنسی پلان بارے بریفنگ دی ۔ اجلاس میں پی ڈی ایم اے پنجاب کمپلیکس کی تعمیر اور ری سٹرکچرنگ پر بھی تبادلہ خیال کیا گیا۔
ڈی جی پی ڈی ایم نے اجلاس میں بتا یا کہ رواں سال مون سون بارشوں کا امکان پہلے سے زیادہ ہے ،مون سون بارشوں اور ممکنہ سیلاب کے پیش نظر تیاریاں مکمل ہو چکی ہیں جبکہ راولپنڈی ،بہاولپور ،سرگودھا ،راجن پور اور جھنگ میں پی ڈی ایم اے کے وئیر ہاوسز بھی قائم کیے جائیں گے ۔
ریلیف کمشنر پنجاب نے اجلا س میں ہدا یات جاری کر تے ہوئے کہا کہ دریاوں اور ندی نالوں کے راستوں سے تجاوزات کو ہٹا کر ممکنہ سیلاب اور مون سون بارشوں کی قبل از وقت تیاری کویقینی بنایا جائے اور اس حوالے سے پنجاب کی تمام اضلاع کے ڈی سیز سے میٹنگ بھی کی جا ئے۔ریلیف کمشنر پنجاب نے انوینٹری مینجمنٹ سسٹم ،سموگ ڈیش بورڈ اور فلڈ ڈیش بورڈ کو جلد ایکٹو کرنے کی ہدایت کی اور مون سون پلان اور موک ایکسرسائز کے انعقاد پر پی ڈی ایم اے کی کارکردگی کو سراہا۔
نبیل جاوید نے اس مو قع پر فلڈ سمولیشن ماڈل کا بھی جائزہ لیا اور وئیر ہاوسز قائم کرنے کی سمری جلد کابینہ کو منظوری کیلئے بھیجنے کی ہدایت کی۔انہوں نے کہا کہ گرین سیورز تھنک ٹینک کا قیام پی ڈی ایم اے کا بہترین اقدام ہے لہذا موسمیاتی تبدیلیوں سے متعلق جامعہ پالیسی بنائی جا ئے کیو نکہ بہترین پالیسیوں پر عملدرآمد سے ماحولیاتی آلودگی کا خاتمہ ممکن ہے ۔
اس مو قع پرریلیف کمشنر پنجاب نے پی ڈی ایم اے ٹیم کو بہترین کارکردگی پر شاباش دیتے ہوئے کہا کہ پی ڈی ایم اے ملازمین کو ترقی کے مساوی مواقع فراہم کریں گے۔
