لاہور،11جون ( اے پی پی ): وزیر اعلیٰ پنجاب مریم نواز شریف سے رکن قومی اسمبلی مسلم لیگ (ن) ملک افضل کھوکھر نے ملاقات کی۔ملاقات میں لاہور ڈویلپمنٹ پلان اور سماجی بہبود سے متعلق اہم امور پر تبادلہ خیال کیا گیا۔پراجیکٹ کی جلد تکمیل اور نئے منصوبوں کے بارے میں تبادلہ خیال کیا گیا ملک افضل کھوکھر نے لاہور کے مضافات میں کلینک آن وہیل کی سروسزکو سراہا۔
ملاقات میں گفتگو کرتے ہوئے مریم نواز شریف نے کہا کہ شہریوں کی فلاح و بہبود کے لیے مقامی سطح پر مشترکہ کوششوں کی ضرورت ہے۔ مسلم لیگ(ن) عوامی جماعت ہے اور جمہوری انداز میں عوامی مسائل حل کرنے پر یقین رکھتی ہے۔
انہوں نے کہا کہ لاہورڈویلپمنٹ پلان میں فراہمی و نکاسی آب کا نظام، رابطہ سڑکوں اور پختہ گلیوں کی تعمیر شامل ہے۔ سٹریٹ لائٹس کی تنصیب اور پارکس کی بحالی بھی ڈویلپمنٹ پلان میں شامل ہے۔ملک افضل کھوکھر نے لاہور کی ری ویمپنگ کے لیے وزیر اعلیٰ کی خصوصی دلچسپی اور وژن کی تعریف کی اور کہا کہ ترقی اور خوشحالی کے اہداف کو حاصل کرنے میں مسلم لیگ (ن) کے ہر کارکن کی سپورٹ آپ کو حاصل ہے۔
