لاہور، 12 جون(اے پی پی): صوبائی وزیر صحت خواجہ عمران نذیر اور وزیراعظم کے کوآرڈینیٹر برائے صحت ڈاکٹر مختار بھرت کی زیر صدارت ڈرگ ریگولیٹری اتھارٹی آف پاکستان (DRAP) کا اہم اجلاس منعقد ہوا جس میں ادویات کی قلت، ادویات کی تیاری، رجسٹریشن، کوالٹی اور پرائس میکانزم پر تفصیلی بحث کی گئی۔ اجلاس میں ادویات کی پروڈکشن کے دوران پائی جانیوالی بے ضابطگیوں کو دور کرنے کے لئے تجاویز پر تبادلہ خیال کیا گیا۔ ڈریپ اور محکمہ صحت پنجاب نے ادویات کی دستیابی، مصنوعی قلت پر قابو پانے کے لئے مل کر چلنے پر اتفاق کیا۔
صوبائی وزیر صحت خواجہ عمران نذیر نے اظہار خیال کرتے ہوئے کہا کہ صوبہ میں مصنوعی قلت، ذخیراندوزی کرنے والوں سے آہنی ہاتھوں سے نمٹا جائیگا، ڈرگ کنٹرول ونگ، ڈریپ کی مشترکہ ٹیمیں مارکیٹوں میں معیاری ادویات کی دستیابی یقینی بنائیں گی۔
خواجہ عمران نذیر نے کہا کہ عوام کی سہولت کے لئے محکمہ صحت اور ڈریپ مشترکہ ڈیسک قائم کریں گے، خواجہ عمران نذیر نے کہا کہ ڈریپ ادویات کی رجسٹریشن، قیمت کا تعین، دیگر زیرالتوا کیسز جلد طے کرنے پر رضامند ہو گیا ہے ۔ کوآرڈینیٹر برائے صحت ڈاکٹر مختار بھرت نے گفتگو کرتے ہوئے کہا کہ ڈریپ کو مزید فعال اور زیر التوا کیسز جلد نمٹانے کے لئے جدید ان لائن نظام وضع کیا جارہا ہے۔
اجلاس میں سی ای او ڈریپ عاصم روف، ڈائریکٹر فارما کو وجیلینس ڈاکٹر عبید، ڈائریکٹر رجسٹریشن ڈریپ ڈاکٹر فخرالدین عامر موجود تھے۔ ڈائریکٹر جنرل ڈرگ کنٹرول محمد سہیل، چیف ڈرگ کنٹرولر اظہر جمال سلیمی اور سیکرٹری پی کیو سی بی ڈاکٹر منور حیات نے بھی اجلاس میں شرکت کی۔
