اسلام آباد،12جون (اے پی پی):وفاقی وزیر برائے خزانہ و محصولات سینیٹر محمد اورنگزیب نے کہا ہے کہ زراعت کی ترقی کے منصوبوں کیلئے بجٹ مالی سال2024-25 میں پانچ ارب روپے مختص کرنے کی تجویز ہے۔
قومی اسمبلی میں آئندہ مالی سال 2024-25ء کی بجٹ تقریر میں وفاقی وزیر برائے خزانہ و محصولات سینیٹر محمد اورنگزیب نے کہا کہ Markup and risk sharing scheme for farm mechanization سکیم کے لیے اگلے سال پانچ ارب روپے مختص کرنے کی تجویز ہے ،اس اقدام سے نجی شعبے کی سرمایہ کاری سے فائدہ اٹھایا جائے گا، سکیم سے پلانٹرز، ٹریکٹرز ،تھریشرز ہارویسٹرز اور موبائل گرین ڈرائیرز کے لیے فائنینسنگ دستیاب ہوگی جبکہ زرعی پیداواری صلاحیت بڑھانے اور ویسٹج کو کم کرنے میں مدد ملے گی۔
سینیٹر محمد اورنگزیب نے کہا کہ زراعت ہماری معیشت کا اہم ستون ہے، زراعت کا جی ڈی پی میں حصہ 24 فیصد اور روزگار کے مواقع پیدا کرنے میں حصہ 37.4 فیصد ہے،زراعت ، لائیو سٹاک اور ماہی پروری قیمتی زر مبادلہ کمانے کے بڑے ذرائع ہیں۔
