لاہور 12- جون ( اے پی پی ) وزیر اعلیٰ پنجاب مریم نواز شریف کی زیر صدارت دوسرے روز بھی تین گھنٹے طویل اجلاس منعقد ہوا ۔اجلاس میں ہیلتھ ریفارمز پر پیشرفت کا جائزہ لیا گیا ۔اجلاس میں چلڈرن ہسپتال لاہور کی ویڈیوز پیش، باتھ روم آپریشن تھیٹر اور دیگر صورتحال پر وزیراعلیٰ مریم نواز شدید برہم وڈیو میں ایمرجنسی میں بچے کا خون بہہ رہا ہےاور ماں دوپٹے سے ڈھانپ رہی ہے۔
وزیر اعلیٰ مریم نواز نے محکمہ صحت حکام کی سخت سرزنش کی اور کہا کہ لاہور کے سب سے بڑے ہسپتال کا یہ حال ہے تو باقیوں کا کیا حال ہو گا۔ ساہیوال میں 8 بچے مر گئے، ہم سب ذمہ دار ہیں, جواب دینا ہوگا۔ وزیر اعلی نے صوبائی مشیر اظہر کیانی کی سربراہی میں تین رکنی اعلی سطح کمیٹی قائم کردی اور کہا کہ کمیٹی ذمہ داروں کا تعین کرکے متعلقہ حکام کو جیل کی سلاخوں کے پیچھے ہونا چاہیے ۔سارے ہسپتال ٹھیک کرنا چاہتی ہوں۔
انہوں نے کہا کہ ہیلتھ کا پورا سسٹم بدلنا ہوگا ،مانیٹرنگ اور احتساب کا نظام لانا ہوگا ۔مانیٹرنگ اور احتساب نہیں ہوگا تو کارکردگی نہیں ہوگی۔ وزیر اعلیٰ نے پنجاب کے ہسپتالوں کی ضروریات اور مسائل کا تعین کرنے کے لیے میپنگ کا حکم دیا اور کہا کہ ویکسینیشن مہم میں خامیوں کو دور کیا جائے۔ پنجاب میں خسرہ کی ویکسینیشن مہم کے لئے فوری اقدامات کیے جائیں ۔
وزیر اعلیٰ مریم نواز شریف نے فیلڈ ہسپتالوں کی تعداد 105 تک بڑھانے کی منظوری دیدی تحصیلوں میں فیلڈ ہسپتال پراجیکٹ یقینی بنانے کی ہدایت کی اورمختلف شہروں کے 11بڑے ہسپتالوں کی ری ویمپنگ کی منظوری دی ۔
اجلاس میں چھوٹے اور دور دراز ہسپتالوں میں سپیشلسٹ ڈاکٹروں کی موجودگی یقینی بنانے کے لئے پلان تیار منسٹر ہیلتھ کی سربراہی میں خصوصی کمیٹی مانیٹرنگ کرے گی۔اجلاس میں صوبے بھر میں ڈاکٹروں کی کارکردگی کا تعین کرنے کے لئے سسٹم وضح کرنے کی ہدایت کی گئی اور امراض قلب کے مریضوں کی ویٹنگ لسٹ کا بیک لاگ ختم کرنے کے اقدامات کا حکم بھی دیا گیا ۔ڈسٹرکٹ ہسپتالوں میں کارڈیالوجی ، سٹروک ، برن اور پیڈز کی ہنگامی علاج کی سہولت یقینی بنانے کی ہدایت بھی دی گئی۔
سنیئر منسٹر مریم اورنگ زیب، صوبائی وزیر اطلاعات عظمیٰ زاہد بخاری،صوبائی مشیر اظہر کیانی، ڈاکٹر عدنان خان، ایم پی اے ثانیہ عاشق، چیف سیکرٹری زاہد اختر زمان ، چیئر مین پی اینڈ ڈی، سیکریٹریز سہیل اشرف، علی جان، پرنسپل سیکرٹری ساجد ظفر ڈال،سی ای او ایڈاپ شاہ میر اور دیگر حکام بھی اجلاس میں موجود تھے۔
