ملتان،13جون(اے پی پی ): سکول ایجوکیشن ڈیپارٹنمنٹ جنوبی پنجاب نے “کوئی بچہ سکول سے باہر نہیں رہ جائے” پروگرام کا پائلٹ پراجیکٹ لانچ کردیا ہے۔پائلٹ پراجیکٹ کا افتتاح ایڈیشنل چیف سیکرٹری ساوتھ پنجاب فواد ہاشم ربانی نے کیا۔ گورنمنٹ ہائی سکول رنگیل پور میں منعقدہ افتتاحی تقریب میں داخل ہونیوالے بچوں اور ان کے والدین کی بڑی تعداد موجود تھی۔
ایڈیشنل چیف سیکرٹری ساوتھ پنجاب فواد ہاشم ربانی نے اس موقع پر گفتگو کرتے ہوئے بتایا کہ “زیرو آوٹ آف سکول چلڈرن” کے نام سے پائلٹ پراجیکٹ کا آغاز جنوبی پنجاب کی 6 یونین کونسلوں میں کیا جارہا ہے اور اس کے لئے بہاولپور، لیہ اور ضلع ملتان سے دو دو یونین کونسلوں کا انتخاب کیا گیا ہے۔انہوں نے بتایا کہ ان یونین کونسلوں میں گھر گھر سروے کر کے سکولوں سے باہر رہ جانیوالے بچوں کا ڈیٹا حاصل کیا گیا ہے۔
ایڈیشنل چیف سیکرٹری کا کہنا تھا کہ پائلٹ پراجیکٹ کی کامیابی کے بعد اسے جنوبی پنجاب کی ہر یونین کونسل میں لاگو کیا جائےگا تاکہ شرح خواندگی میں سو فیصد اضافہ کیا جاسکے اور اس کے نتیجے میں خطے سے غربت کے خاتمہ کیا جاسکے۔ انہوں نے مزید بتایا کہ اس پراجیکٹ پر کوئی بجٹ یا اضافی فنڈز خرچ نہیں کئے جارہے،سکول میں داخل ہونیوالے بچوں کو یونیفارم، بیگز اور سٹیشنری جائیکا(JICA) کی جانب سے فراہم کی جارہی ہے جبکہ یونیسف ہمارا چیف پارٹنر ہے۔
انہوں نے بتایا کہ پراجیکٹ کے بارے حکومت پنجاب کو سمری کے ذریعے آگاہ کیا جارہا ہے تاکہ پروگرام کو پورے پنجاب اور پاکستان میں لانچ کیا جا سکے جو کہ تعلیم کے شعبےمیں ایک انقلابی قدم ثابت ہوگا۔
ایڈیشنل چیف سیکرٹری نے منفرد پروگرام لانچ کرنے پر سکول ایجوکیشن ڈیپارٹمنٹ جنوبی پنجاب کوخراج تحسین کیا۔اس موقع پر سکول میں داخل ہونیوالے بچوں میں یونیفارم، سکول بیگرز اور سٹیشنری بھی تقسیم کی گئی۔
سیکرٹری سروسز انجینئیر امجد شعیب خان ترین، سیکرٹری سکول ایجوکیشن ڈیپارٹنمنٹ ڈاکٹر عبیدااللہ کھوکھر، ایڈیشنل سیکرٹریز محمد فاروق ڈوگر، خواجہ مظہرالحق اور سی ای او ایجوکیشن فیض احمد بھی اس موقع پر موجود تھے۔
