کوئٹہ،13جون(اے پی پی): وزیر اعلٰی بلوچستان میر سرفراز بگٹی نے یوتھ پالیسی 2024 کو دور جدید کے تقاضوں اور نوجوانوں سمیت ٹرانس جینڈر اور تمام محکوم طبقات کے جوانوں کی ضروریات سے ہم آہنگ کرنے کی ضرورت پر زور دیتے ہوئے کہا کہ نوجوانوں کو تعلیم روزگار اور ترقی کے مواقع فراہم کرنا ضروری ہیں۔
ان خیالات کا اظہار انہوں نے جمعرات کو یہاں اپنے زیر صدارت یوتھ پالیسی 2024 کی تشکیل سے متعلق منعقد جائزہ اجلاس میں کیا۔ سیکرٹری کھیل و یوتھ افئیرز طارق قمر بلوچ نے بلوچستان یوتھ پالیسی 2024 سے متعلق بریفنگ دیتے ہوئے مجوزہ ڈرافٹ کے خدوخال سے آگاہ کیا ہے۔
وزیر اعلٰی نے محکمہ یوتھ افئیرز کو ہدایت کی کہ نوجوانوں کو صحت مندانہ سرگرمیوں میں مصروف رکھنے کے لئے پورے سال کا کلینڈر مرتب کیا جائے۔
وزیر اعلٰی بلوچستان نے شہید سراج خان رئیسانی فٹبال ٹورنامنٹ اور شہید پروفیسر فضل باری کرکٹ ٹورنامنٹ کرانے کا اعلان کرتے ہوئے کہا کہ شہداء کی قربانیوں کو فراموش نہیں کیا جاسکتا، اپنے شہداء کو نہیں بھولے، رہتی دنیا تک انہیں یاد رکھا جائے گا۔
اجلاس میں رکن قومی اسمبلی نوابزادہ جمال خان رئیسانی نے آن شرکت کی۔
