لاہور18-جون(اے پی پی): وزیراعلیٰ پنجاب مریم نواز شریف سے اسپین کے سفیر جوز انتونیو ڈی اوری اور اعزازی قونصل برائے اسپین جلال صلاح الدین نے ملاقات کی، پنجاب اور سپین کے درمیان تجارت، سرمایہ کاری، تعلیم، ثقافت اور سیاحت کے فروغ پر تبادلہ خیال کیا۔ ملاقات میں باہمی تعلقات کو مضبوط بنانے کی مشترکہ کاوشوں کو بڑھانے کی ضرورت پر زور دیا۔
ملاقات میں انفراسٹرکچر ، قابل تجدید توانائی، لائیو سٹاک اور زراعت میں سرمایہ کاری کے امکانات بھی زیر غور آئے۔
وزیراعلیٰ مریم نواز شریف نے کاروبار کی ترقی کے لیے سرمایہ کاروں کو سازگار ماحول فراہم کرنے کے حوالے سے پائیدار حکومتی اقدامات سے اسپین کے سفیر کو آگاہ کیاہسپانوی سفیر نے پنجاب میں مضبوط اقتصادی شراکت داری کو فروغ دینے میں گہری دلچسپی کا اظہار کیا۔
مریم نواز شریف نے کہا کہ اسپین کی بزنس کمیونٹی کیلئے ٹیکسٹائل، فوڈ پراسیسنگ، زراعت اور لائیو سٹاک میں سرمایہ کاری کے مواقع موجود ہیں۔ انھوں نے کہا کہ غیر ملکی سرمایہ کاروں کو محفوظ سرمایہ کاری کیلئے بہترین ماحول فراہم کیا جارہا ہے۔
مریم نواز شریف نے کہا کہ پاکستان اور سپین کے تجارتی حجم میں اضافہ کا رحجان خوش آئند ہے۔ پنجاب حکومت اسپین کے ساتھ سرمایہ کاری اور تجارتی حجم میں مزید اضافے کی خواہش مند ہے۔سینئر منسٹر مریم اورنگزیب، دیگرحکام بھی اس موقع پر موجود تھے۔
