ٹنڈومحمدخان،27 جون(اے پی پی):ایس ایس پی ٹنڈومحمدخان عابد بلوچ نے کہا ہے کہ محرم الحرام میں امن و امان کا قیام اولین ترجیح ہے، فرقہ وارانہ ہم آہنگی کو برقرار رکھا جائے گا، محرم الحرام کے دوران کسی بھی شخص کو بھی امن و امان خراب کرنے کی ہرگز اجازت نہیں دی جائے گی۔
یہ بات انہوں نے اپنے آفس میں محرم الحرام کے حوالے سے منعقدہ اجلاس سے خطاب کے دوران کہی، اجلاس میں سیاسی، سماجی و مذہبی رہنماؤں و علمائے کرام نے شرکت کی۔
اجلاس میں محرم الحرام کے دوران امن و امان کی صورتحال کو برقرار رکھنے اور مذہبی و فرقہ ورانہ ہم آہنگی کو فروغ دینے پر اتفاق کیا گیا، تمام فرقوں سے تعلق رکھنے والے علمائے کرام اور مذہبی جماعتوں کے رہنماؤں نے ایک دوسرے کے ساتھ مکمل تعاون کی یقین دھانی کرائی جبکہ ایس ایس پی عابد بلوچ کو محرم الحرام کے دوران پیش آنے والے مسائل سے آگاہ کیا۔
اس موقع پر ایس ایس پی عابد بلوچ نے اپنے خطاب میں کہا کہ ٹنڈومحمدخان ہمیشہ امن کا گہوارہ رہا ہے، محرم الحرام کے دوران ہر صورت امن و امان کو برقرار رکھا جائے گا، کوئی چاہے کتنا ہی بااثر کیوں نا ہو اسے امن و امان خراب کرنے کی ہرگز اجازت نہیں دی جائے گی، بھائی چارگی کو فروغ دینے کے لئے تمام مسالک کے علمائے کرام اپنا کردار ادا کریں۔
انہوں نے کہا کہ محرمِ الحرام کے دوران پولیس متحرک ہوگی، تمام ماتمی جلوسلوں اور مجالس میں پولیس نفری موجود ہوگی، جبکہ ماتمی جلوسوں کی گزر گاہوں پر بھی اضافی نفری تعینات کی جائے گی، عزاداروں کو شناخت اور چیکنگ کے بعد مجالس اور ماتمی جلوسوں میں شرکت کی اجازت دی جائے گی۔انہوں نے کہا کہ سی سی ٹی وی کیمروں سے ماتمی جلوسوں کی نگرانی کی جائے گی، محرم الحرام کے دوران سیکورٹی کے انتظامات کو حتمی شکل دے دی گئی ہے۔
