پشاور,28 جون(اے پی پی): خیبرپختونخوا میں انسداد پولیو مہم جولائی 2024 کا اجراء کر دیا گیا۔ وزیر اعلیٰ خیبرپختونخوا سردار علی امین خان گنڈاپور نے بچوں کو پولیو کے قطرے پلا کر مہم کا باضابطہ اجراء کیا۔
پانچ روزہ انسدادِ پولیو مہم یکم جولائی سے پانچ جولائی تک جاری رہے گی۔ اس مہم کے تحت صوبے کے چھ مکمل اضلاع صوابی، سوات، ٹانک، شمالی وزیرستان، جنوبی وزیرستان لوئر، اور جنوبی وزیرستان اپر میں انسداد پولیو کے قطرے پلائے جائیں گے۔ اسی طرح پانچ اضلاع کی مخصوص یونین کونسلوں میں بھی یہ مہم چلائی جائے گی، جن میں ڈی آئی خان کی 22 یونین کونسلز، پشاور کی تین جبکہ کرم، بنوں اور لکی مروت کی ایک ایک یونین کونسل شامل ہیں۔
وزیر اعلیٰ خیبر پختونخوا سردار علی امین گنڈاپور نے بتایا کہ مہم کے تحت مجموعی طور پر 12 لاکھ 99 ہزار بچوں کو انسداد پولیو کے قطرے پلانے کا ہدف مقرر کیا گیا ہے۔ اس مقصد کے لئے 9,921 ٹیمیں تشکیل دی گئی ہیں اور پولیو ٹیموں کی حفاظت کے لئے تقریباً 15 ہزار سکیورٹی اہلکار تعینات ہوں گے۔
وزیر اعلیٰ نے اس بات پر زور دیا کہ رواں سال اب تک پولیو کا کوئی کیس سامنے نہیں آیا، جو کہ ایک حوصلہ افزا بات ہےاور کہا ہم نے ملک اور خیبرپختونخوا کو پولیو فری بنانا ہے اور پولیو وائرس کا خاتمہ ہماری حکومت کی بھی اہم ترجیحات میں شامل ہے۔
سردار علی امین گنڈاپور نے والدین سے اپیل کی کہ وہ اپنے بچوں کو انسداد پولیو کے قطرے ضرور پلائیں اور انہیں عمر بھر کی معذوری سے بچائیں۔ انہوں نے مزید کہا کہ صوبے کو پولیو وائرس سے پاک کرنے کے لیے معاشرے کے تمام طبقات کو اپنا انفرادی اور اجتماعی کردار ادا کرنا ہو گا۔انہوں نےفرنٹ لائن پولیو ورکرز کو ہیرو قرار دیا اور والدین سے گزارش کی کہ وہ گھر گھر جانے والے پولیو ورکز سے مکمل تعاون کریں۔ آخر میں، سردار علی امین گنڈاپور نے پولیو ڈیوٹی کے دوران اپنی جانیں دینے والے پولیو ورکرز اور فورسز کے اہلکاروں کی قربانیوں کو سلام پیش کیا۔
