لاہور، 30جون (اے پی پی): صوبائی وزیر صنعت و تجارت چوہدری شافع حسین سے کوٹ بیلہ گجرات سے تعلق رکھنے والے پاکستان مسلم لیگ کے پارٹی ورکرز نے ملاقات کی۔ملاقات میں عوام کو ریلیف کی فراہمی کے حکومتی اقدامات اور علاقے کے ترقیاتی مسائل پر بات چیت کی گئی۔
صوبائی وزیر صنعت و تجارت چوہدری شافع حسین نے گفتگو کرتے ہوئے کہا کہ حکومت نے پہلے 100 دنوں میں عوام کو ریلیف کی فراہمی کے تاریخ ساز اقدامات کئے، حکومت کی موثر حکمت عملی کے باعث مہنگائی 30فیصد کی شرح سے کم ہوکر 11.8فیصد پر آئی ہے۔ مختصر ترین وقت میں آٹا، گھی، چکن، سبزیوں اور دیگر اشیاء ضروریہ کی قیمتوں میں ریکارڈ کمی ہوئی ہے۔
انھوں نے بتایا کہ وزیر اعلیٰ کی ہدایت پر اشیاء ضروریہ کی دستیابی ،معیار اور قیمتوں کی مانیٹرنگ کی جارہی ہے۔ ذخیرہ اندوزوں اور ناجائز منافع خوروں کے خلاف کریک ڈاؤن جاری ہے۔
صوبائی وزیر نے کہا کہ عوام کو کسی صورت مہنگائی مافیا کے رحم وکرم پر نہیں چھوڑ سکتے۔ پنجاب پرائس کنٹرول آف ایسنشئل کموڈیٹز ایکٹ 2024نافذ کیا گیا ہے۔ عوام کو ریلیف کی فراہمی کا سلسلہ جاری رہے گا،انھوں نے کہا کہ کاروباری اور معاشی سرگرمیوں کے فروغ کیلئے موثر اقدامات کئے گئے ہیں۔
چوہدری شافع حسین نے کہا کہ حکومت کی سرمایہ کار دوست پالیسیوں کے باعث غیر ملکی سرمایہ کار پنجاب کا رخ کررہے ہیں صوبائی وزیر نے کہا کہ پنجاب ترقی اور خوشحالی کے نئے دور میں داخل ہوگاچوہدری شافع حسین نے کہا کہ گجرات میں انفارمیشن ٹیکنالوجی یونیورسٹی، نئی انڈسٹریل اسٹیٹ ،فرنیچر کالج اور بزنس فسیلیٹیشن سینٹر بنے گا، گجرات کو ترقی کے لحاظ ماڈل شہر بنائیں گے۔چوہدری شافع حسین نے کوٹ بیلہ گجرات کے ترقیاتی مسائل کے حل کی بھی یقین دہانی کروائی۔ملاقات کرنے والوں میں چوہدری ندیم اسلم، چوہدری نعیم اسلم، چوہدری خرم شہزاد، صوفی ممتاز اکبر اور دیگر شامل تھے۔
