اسلام آباد،05 جولائی (اے پی پی):نیشنل انسٹیٹیوٹ آف مینیجمنٹ اسلام میں 40 مڈ کیریئر منیجمنٹ کورس کے آفیسرز کی سرٹیفکیٹ ایوارڈ تقریب جمعے کو یہاں منعقد ہوئی۔ ایوارڈ تقریب میں مہمان خصوصی گورنر خیبر پختونخوا فیصل کریم کنڈی نے خطاب کرتے ہوئے کہا تربیتی کورس ایک ایسا عمل ہے جو آپ کی صلاحیتوں کو نکھارنے سمیت مستقبل کے چیلنجز کا سامنا کرنے کے لیے تیار کرتا ہے،ملک وقوم کے مستقبل کی بھاگ دوڑ آپ کے ہاتھ میں ہے۔انہوں نے کہا کہ آپ لوگ ملک وقوم کی تعمیر کے عمل کا مرکزی حصہ ہیں۔آپ جیسے سرکاری افسران ملک وقوم کا مستقبل ہیں،عوام اور آپ کے درمیان فاصلے کم ہونے چاہیے۔
انہوں نے کہا کہ آپ اپنی ذمہ داریاں آئین و قانون کے مطابق ادا کریں اور ایسے کسی عمل کا حصہ نہ بنیں جس سے ملک کا نقصان ہو۔جس طرح نجی شعبے ترقی کر رہے ہیں، سرکاری اداروں میں بھی جدت لانے کی ضرورت ہے،یہ تربیتی عمل کے کورسز وقت کی ضرورت بھی ہیں۔
