اسلام آباد،25جولائی(اے پی پی):وفاقی وزیر برائے نجکاری ، سرمایہ کاری بورڈ اور مواصلات عبدالعلیم خان سےآسٹریلین ہائی کمشنر نیل ہاکنز نے جمعرات کو یہاں ملاقات کی جس میں دونوں ممالک کے مابین نجکاری اور سرمایہ کاری سمیت مختلف اہم امور پر گفتگو کی گئی ۔
اس موقع پر وفاقی وزیر عبدالعلیم خان نے کہا کہ ملکی معیشت کی بہتری کے لئے اداروں کی نجکاری کا عمل کلیدی حیثیت رکھتا ہے، خسارے میں چلنے والے اداروں کو پرائیویٹائز کر کے منافع بخش بنایا جا سکتا ہے۔انہوں نے کہا کہ خسارے والے اداروں کے باعث ملکی معیشت نقصان میں تھی جس سے بچنے کے لیے نجکاری ضروری تھی۔
وفاقی وزیر نے کہا کہ پی آئی اے، ہاؤس بلڈنگ فنانس کارپویشن اور فرسٹ ویمن بینک کی نجکاری ہو رہی ہے۔انہوں نے کہا کہ غیر ملکی سرمایہ کاری سمیت پاکستان میں صنعتوں کی ترقی کیلئے خاطر خواہ گنجائش موجود ہے۔
اس موقع پر آسٹریلین ہائی کمشنر نیل ہاکنز نے وفاقی وزیر عبدالعلیم خان سے سرمایہ کاری اور دو طرفہ تعاون میں اضافے سمیت اہم امور پر تفصیلی بات چیت کی۔
