لاہور،2 اگست ( اے پی پی ): ایکسل لوڈ قوانین کے موثر نفاذ کیلئے پنجاب اور این ایچ اے کے مابین تعاون بڑھانے کا فیصلہ۔ایکسل لوڈ ڈیٹا سے متعلق معلومات کے تبادلے کیلئے این ایچ اے اور پنجاب کے سسٹم کو باہم منسلک کیا جائے گا۔ چیف سیکرٹری پنجاب زاہد اختر زمان کی زیر صدارت ایکسل لوڈ منیجمنٹ پر عملدرآمد کا جائزہ لینے کیلئے اجلاس منعقد ہوا ۔
آئی جی نیشنل ہائی ویز اینڈ موٹر ویز پولیس سردار علی خان اور چیئرمین این ایچ اے شہریار سلطان نے ویڈیو لنک کے ذریعے اجلاس میں شرکت کی۔اجلاس سے خطاب کرتے ہوئے چیف سیکرٹری پنجاب زاہد اختر زمان نے کہا کہ پنجاب میں دو ہزار کلو میٹر شاہراہوں پر ایکسل لوڈ رجیم پر کامیابی سے عملدرآمد کرایا جا رہا ہے۔ ایکسل لوڈ منیجمنٹ کے ذریعے اربوں روپے کی لاگت سے تعمیر سڑکوں کو ٹوٹ پھوٹ سے بچایا جا سکے گا۔ انہوں نے کہا کہ مال بردار گاڑیوں کی چیکنگ کیلئے مستقل ویٹ سٹیشن قائم کئے گئے ہیں۔ نئی تعمیر ہونے والی تمام سڑکوں پر مستقل ویٹ سٹیشن بنائے جائیں گے۔سیکرٹری ٹرانسپورٹ ڈاکٹر احمد جاوید قاضی نے اجلاس کو تفصیلی بریفنگ دی۔اور بتایا کہ جولائی میں پنجاب ہائی وے پولیس نے 53 ہزار سے زائد مال بردار گاڑیوں کو چیک کیا۔61 فیصد گاڑیوں میں اوور لوڈنگ پائی گئی۔ ایکسل لوڈ کی سب سے زیادہ خلاف ورزی جھنگ، چنیوٹ اور فیصل آباد میں پائی گئی۔
اجلاس میں مواصلات و تعمیرات، معدنیات کے محکموں کے سیکرٹریز، چیئرمین پی آئی ٹی بی، پنجاب ہائی ویز پولیس کے حکام اور متعلقہ افسران نے شرکت کی۔
