لاہور، 7 اگست (اے پی پی): چیمبر آف کامرس اینڈ انڈسٹری لاہور نے مزدور خوشحال ترقی بے مثال مہم کا حصہ بننے کا اعلان کردیا۔ صوبائی وزیر لیبر اینڈ ہیومن ریسورس پنجاب فیصل ایوب کھوکھر کی زیرِ صدارت چیمبر آف کامرس اینڈ انڈسٹری میں اہم اجلاس منعقد ہوا۔ لاہور چیمبر آف کامرس اور محکمہ لیبر نے مزدوروں کی فلاح کے لئے مشترکہ کام کرنے کے عزم کا اظہار کیا۔
صوبائی وزیر لیبر نے گفتگو کرتے ہوئے کہا کہ پنجاب بھر میں مزدوروں کو کم از کم اجرت 37 ہزار روپے کے حکومتی فیصلے پر مکمل عمل درآمد ہو گا۔ فیصل ایو ب کھوکھر نے کہا کہ ُپنجاب حکومت چائلڈ لیبر کی عمر 15 سال سے بڑھا کر 16 سال کررہی ہے۔ 18 سال سے کم عمر بچوں کو 38 خطرناک انڈسٹریز میں ملازمت پر نہیں رکھا جائے گا۔ پنجاب بھر میں خواتین مزدوروں کے بچوں کے لئے ابتدائی طور پر 500 ڈے کیئر سنٹر ز بنائیں گے۔
صوبائی وزیر لیبر نے کہا کہ فیکٹریوں میں مزدوروں کے لئے فیئر پرائس شاپس بنانے کا فیصلہ بھی کیا گیا ہے۔ صوبائی وزیر نے کہا کہ پنجاب حکومت کا پہلی مرتبہ ایگرکلچرل اور کنسٹرکیشن سیکشن کو لیبر قوانین کے تحت لانے کا فیصلہ بھی کرلیا گیا ہے۔
اجلاس میں لاہور چیمبر آف کامرس کے 40 ہزار عہدیدران کی آسانی کے لئے پیسی، لیبر اور ورکرز ویلفیئر فنڈ سے افسران کو بطور فوکل پرسن تعینات و کمیٹی بنانے پر اتفاق کیا گیا۔
صوبائی وزیر لیبر نے کہا کہ حکومت پنجاب مزدوروں کی فلاح اور بزنس مالکان کے لئے اقدامات کررہی ہے۔ فیصل ایوب کھوکھر نے ہدایت دی کہ فیکٹریوں میں کام کے دوران حادثات سے بچانے کے لئے ورکرز کی سیفٹی کو یقینی بنایا جائے۔
صوبائی وزیر نے کہا کہ چائلڈ لیبر اور جبری مشقت کا خاتمہ ہر صورت ہو گا۔ صوبائی وزیر بزنس کمیونٹی کو درپیش مسائل کے حل کے لئے اقدامات کئے جائیں گے۔ حکومت پنجاب بزنس کمیونٹی کے ساتھ کھڑی ہے۔
فیصل ایو ب کھوکھر نے کہا کہ پنجاب میں فیکٹریاں چلیں گی تو مزدوروں کا چولہا چلے گا۔ انھوں نے کہا کہ حکومت پنجاب اور فیکٹری مالکان مزدروں کے حقوق کے محافظ ہیں۔ ایک سال کے دوران 80 لاکھ سے زائد مزدوروں اور ان کے خاندان کو 20860 ملین کی مفت میڈیکل سہولیات دی گئیں ہیں۔ 39349 ورکرز کو 9051ملین کی ویلفیئر گرانٹ دی گئی ہیں۔ مزدوروں کے بچوں کے تمام تر تعلیمی اخراجات اُٹھائے جا رہے ہیں۔ صوبائی وزیر لیبر نے کہا کہ وزیر اعلیٰ پنجاب مریم نواز شریف مزدوروں اور بزنس کمیونٹی کی فلاح کے لئے کوشاں ہیں۔
صدر لاہور چیمبر آف کامرس کاشف انور و ایگزیکٹو ممبران نے صوبائی وزیر کو مکمل تعاون کا یقین کرائی۔ سیکرٹری لیبر پنجاب نعیم غوث، ڈی جی لیبر پنجاب کلثوم حیٰ، وائس کمشنر پیسی ڈاکٹر ذوالفقار علی کھرل، سی ای او ورکرز ویلفیئرفنڈز توقیر الیاس چیمہ بھی صوبائی وزیر کے ہمراہ تھے۔
