لاہور۔5مارچ (اے پی پی):وزیر تعلیم رانا سکندر حیات نے میٹرک امتحانات کے پہلے روز مختلف امتحانی مراکز کے اچانک دورے کئے ،انہوں نے سنٹرز کامعائنہ کرنے کے علاوہ بوٹی مافیا کے خلاف انتظامات کا جائزہ لیا اور سی سی ٹی وی کیمروں کی ورکنگ بھی چیک کی۔
انہوں نے لارنس روڈ اور کیتھڈرل کے امتحانی مراکز کے دورے کئے اور طلبہ سے انتظامات و دیگر امور بارے استفسار کیا، وزیر تعلیم نے کنٹرول روم کا بھی دورہ کیا اور بورڈ آفس میں اجلاس کی صدارت کرتے ہوئے ہدایات دیں، وزیر تعلیم نے ڈیوٹی سے غیر حاضر عملہ کے خلاف زیرو ٹالیرنس اختیار کرنے کی ہدایت کرتے ہوئے ڈیوٹی سے انکار کرنے والے افراد کے ناموں کی لسٹیں بھی فوری طور پر طلب کر لیں۔
وزیر تعلیم نے کہا کہ امتحانی ڈیوٹی سے غیر حاضر عملہ کے خلاف پیڈا ایکٹ کے تحت کارروائی کی جائے، انہوں نے کہا کہ سروس رولز کے تحت کوئی سرکاری ٹیچر ڈیوٹی سے انکار نہیں کر سکتا۔
وزیر تعلیم نے بورڈ حکام کو دیگر بورڈز کے کنٹرول روم کی سنٹرل ایکسیس لینے کی ہدایت کی اور آئندہ دنوں میں مختلف اضلاع کے امتحانی مراکز کے اچانک دوروں کا عندیہ بھی دیا۔
