لاہور،07 مارچ (اے پی پی): وزیر زراعت ولائیو سٹاک پنجاب سید عاشق حسین کرمانی کی زیر صدارت وزیر اعلیٰ پنجاب سٹرس ڈویلپمنٹ ٹاسک فورس کا پہلا اجلاس منعقد ہوا جس میں وزیر اعلیٰ پنجاب کے ویژن کے تحت سٹرس کی بحالی و ترویج کیلئے اقدامات کا جائزہ لیا گیا۔
وزیر زراعت پنجاب نے کہا کہ سٹرس کی بحالی حکومت پنجاب کی ترجیحات میں شامل ہے۔ سٹرس برآمدات میں اضافہ اور بین الاقوامی معیار کے مطابق اس کی ویلیو چین میں بہتری لانے کی ضرورت ہے۔
وزیر زراعت و لائیو سٹاک نے کہا کہ حکومت پنجاب صوبہ میں سٹرس (ترشاوہ) پھلوں کی بحالی اور پیداوار میں اضافے کے لئے مختلف اقدامات اٹھا رہی ہے۔انھوں نے کہا کہ سٹرس کے باغات موسمیاتی تبدیلیوں کے باعث تنزلی کا شکار ہیں اور اس کے پودے مختلف بیماریوں میں مبتلا ہیں۔ سٹرس خاص طور پر کینو کے پھل کا سائز اور اس کی شیلف لائف میں کمی واقع ہوئی ہے۔ انھوں نے کہا کہ سٹرس فیملی میں کینو خاص طور پر صوبہ پنجاب کی پہچان ہے۔وزیر اعلیٰ پنجاب کسان پیکج کے تحت سٹرس کی بحالی کیلئے1.2 ارب روپے کی خطیر رقم مختص کی گئی ہے۔جس کا مقصد سٹرس کی سرٹیفائیڈ نرسریوں اور نئے باغات کا قیام عمل میں لانا ہے۔
وزیر زراعت نے کہا کہ اس منصوبہ کے تحت سٹرس کی پیداوار اور برآمدات میں اضافہ کرنا مقصود ہے۔ سید عاشق حسین کرمانی نے کہا کہ سٹرس کی بحالی کے پروگرام کا مقصدجدید زرعی ٹیکنالوجی کے استعمال سے سٹرس کے سرٹیفائیڈ پودوں کی تیاری اور کاشتکاروں کی فنی راہنمائی ہے۔ اس مقصد کے حصول کیلئے صوبہ پنجاب میں باغبانوں کی نرسریوں کو باقاعدہ طور پر رجسٹرڈ کیا جائے گا۔ صوبائی وزیر زراعت نے کہا کہ سٹرس زوننگ پر عمل پیرا ہونے کی ضرورت ہے۔
صوبائی وزیر زراعت نے ہدایت دی کہ سرگودھا میں ایک بڑے رقبے پر سٹرس بحالی کیلئے ٹارگٹڈ پروگرام شروع کیا جائے اور سٹرس کے باغات کیلئے نئے علاقے مثلاً تھل، ڈی جی خان وغیرہ کا جامع سروے کیا جائے۔
اجلاس میں پارلیمانی سیکرٹری برائے زراعت اُسامہ خان لغاری، نائب کنونئیر سٹرس ڈویلپمنٹ ٹاسک فورس پنجاب محسن شاہ نواز رانجھا،سیکرٹری زراعت پنجاب افتخار علی سہو اور سیکرٹری انڈسٹریز کامرس اینڈ انوسٹمنٹ عمر مسعود، ڈائریکٹر جنرلز زراعت ساجد الرحمان، نوید عصمت کاہلوں، پلاننگ اینڈ ڈویلپمنٹ بورڈ کے نمائندگان اور سٹرس کے ایکسپورٹرز، ماہرین و دیگر اسٹیک ہولڈرز نے شرکت کی۔
