لاہور 10 اپریل (اے پی پی): سندس فاؤنڈیشن کے زیر اہتمام تھیلیسیمیا سے متاثرہ بچوں نے سنٹرل پولیس آفس کا دورہ کیا۔ چیئرمین سندس فاؤنڈیشن حاجی سرفراز احمد کی قیادت میں بچوں نے آئی جی پنجاب ڈاکٹر عثمان انور سے ملاقات کی۔ ایڈیشنل آئی جی ویلفیئر اینڈ فنانس عمران ارشد، ڈی آئی جی ویلفیئر غازی محمد صلاح الدین، اے آئی جی فنانس ڈاکٹر ندا عمر چٹھہ، اے آئی ویلفیئر عبدالرحیم شیرازی سمیت سینئر افسران بھی موقع پر موجود تھے۔
آئی جی پنجاب ڈاکٹر عثمان انور نے گفتگو کرتے ہوئے کہا کہ پنجاب پولیس نے تھیلیسیمیا کے بچوں کی سرپرستی اور سپورٹ کا بیڑا اٹھایا ہے، پنجاب پولیس نے تھیلیسیمیا سے متاثرہ بچوں کے لئے اب تک لاکھوں بوتل خون عطیہ کیا، آئی جی پنجاب نے کہا کہ پنجاب پولیس نے کورونا وبا کے دوران بھی تھیلیسیمیا سے متاثرہ بچوں کے لیے خون کے عطیات دیئے، آئی جی پنجاب نے کہا کہ شہریوں اور تھیلیسیمیا سے متاثرہ بچوں کے لیے سیف سٹیز اتھارٹی میں ورچوئل بلڈ بینک قائم کیا گیا ہے، ڈاکٹر عثمان انور نے کہا کہ پولیس ملازمین کے تھیلیسیمیا سے متاثرہ 161 بچوں کو 45 ہزار روپے سہ ماہی بنیادوں پر دیئے جا رہے ہیں، پنجاب پولیس سالانہ 2 ارب روپے سے زائد شہدا اور ملازمین کی فیملیز کی فلاح و بہبود پر خرچ کر رہی ہے، ڈاکٹر عثمان انور نے کہا کہ 3 ہزار سپیشل بچوں کو رجسٹر کرکے بیماریوں کی تشخیص، علاج معالجہ کروایا گیا۔
ڈاکٹر عثمان انور نے کہا کہ دماغی معذوری کا شکار 632 بچوں کو ماہانہ 10 ہزار روپے امداد دی جا رہی ہے، شہدا اور پولیس ملازمین کے بچوں کو کڈنی، لیور اور ہارٹ سرجری سنگین امراض کے علاج معالجے کیلئے 32 کروڑ روپے فنڈز خرچ کئے گئے ہیں، قوت سماعت سے محروم 34 بچوں کے کوکلئیر امپلانٹ سرجری کیلئے 6 کروڑ روپے خرچ کیے گئے ہیں، آئی جی پنجاب نے کہا کہ سپیشل اداروں میں زیر تعلیم بچوں کو ساڑھے 4 لاکھ روپے سالانہ وظیفہ دیا جا رہا ہے۔ سندس فاؤنڈیشن کے تھیلیسیمیا سے متاثرہ بچوں نے شہدا و غازی والز، میوزیم، کانسٹیبلری لاوئج سمیت سی پی او کے مختلف شعبوں کا دورہ بھی کیا۔ چیئرمین سندس فاؤنڈیشن حاجی سرفراز احمد نے آئی جی پنجاب ڈاکٹر عثمان انور کو پھولوں کا گلدستہ اور سوینئر پیش کیا۔
