ملتان،18 اپریل (اے پی پی ): کمشنر ملتان ڈویژن عامر کریم خاں نے بچوں کو پولیو سے بچاؤ کے قطرے پلا کر انسداد پولیو مہم کا افتتاح کردیا ہے جبکہ انسداد پولیو مہم 21 اپریل تا 23 اپریل تک جاری رہے گی، اس دوران ڈویژن میں 10 ہزار سے زائد ٹیمیں 26 لاکھ سے زائد بچوں کو پولیو سے بچاؤ کے قطرے پلائیں گی۔
اس موقع پر کمشنر عامر کریم خاں نے کہا کہ پولیو فری پاکستان کیلئے والدین کا تعاون ناگزیر ہے۔ انہوں نے کہا کہ اپنے بچوں کو عمر بھر کی معذوری سے بچانے کیلئے پولیو سے بچاؤ کے قطرے پلائیں۔
کمشنر نے وارننگ دیتے ہوئے کہا کہ پولیو قطرے پلانے سےانکار کرنے والے والدین کے خلاف سخت قانونی کارروائی ہوگی۔انہوں نے کہا کہ جنرل بس سٹینڈ سمیت عوامی مقامات پر پولیو کیمپ بھی قائم کئے گئے ہیں۔انہوں نے کہا کہ ڈویژن میں پولیو سے متاثرہ کوئی کیس رپورٹ نہیں ہوا ہے۔
اس موقع پر ڈپٹی کمشنر محمد علی بخاری نے کہا کہ ضلع ملتان کے 10 لاکھ 26 ہزار بچوں کو پولیو قطرے پلانے کا ہدف مقرر ہے ، 3 ہزار سے زائد فیلڈ ٹیمیں گھروں اور عوامی مقامات پر خصوصی پولیو مہم میں شریک ہونگی۔
محمد علی بخاری نے کہا پولیو قطرے پلانے سے انکار کرنے والوں کے خلاف سخت قانونی کارروائی عمل میں لائی جائے گی۔ انہوں نے کہا کہ پولیو ٹیموں سیکورٹی کیلئے جامع پلان تشکیل دیا گیا ہے۔
