لاہور ،18 اپریل(اے پی پی): وزیراعلیٰ پنجاب کے جیل ریفارمز ایجنڈا پر بھرپور انداز میں عملدرآمد جاری ہے۔ سیکرٹری داخلہ پنجاب نور الامین مینگل کی ہدایت پر صوبہ بھر کی جیلوں میں انڈور سپورٹس مقابلے شروع ہو چکے ہیں۔ پنجاب بھر کی جیلوں میں انٹرا ریجن والی بال ٹورنامنٹ کا آغاز ہو گیا ہے جس میں اسیران بڑھ چڑھ کر حصہ لے رہے ہیں۔
ترجمان محکمہ داخلہ پنجاب نے بتایا کہ پنجاب کی جیلوں میں والی بال ٹورنامنٹ 18 سے 26 اپریل تک جاری رہے گا۔ ٹورنامنٹ کے پہلے مرحلے میں تمام ریجنز کی ٹیمیں آپس میں مقابلہ کر رہی ہیں۔ دوسرے مرحلے میں اپنے ریجنز کی فاتح ٹیمیں دوسرے ریجنز سے مقابلہ کریں گی اور پنجاب لیول کے مقابلے ہوں گے۔ ترجمان نے بتایا کہ تمام ریجنز کے ڈی آئی جیز نے جیل سپرنٹینڈنٹس کے ساتھ مل کر جیلوں میں والی بال ٹیمیں تشکیل دیں۔
ترجمان محکمہ داخلہ پنجاب نے بتایا کہ مثبت سرگرمیوں کے فروغ سے اسیران کو صحت مند ماحول فراہم کر رہے ہیں۔ انہوں نے بتایا کہ کھیلوں کے مقابلوں کے بعد ہنرمند اسیران کے مابین بھی مقابلے ہوں گے۔ ترجمان نے کہا کہ سنہری اصول “نفرت جرم سے؛ مجرم سے نہیں” کے تحت اسیران کی فلاح و بہبود اور تربیت جاری ہے۔ جیل انڈسٹری میں ہنر سیکھنے کے ساتھ کھیلوں میں حصہ لیکر اسیران نارمل زندگی کی جانب واپس آئیں گے۔
