لاہور ،23 اپریل (اے پی پی): معاون خصوصی وزیر اعلیٰ پنجاب راشد اقبال نصر اللہ کی زیر صدارت پنجاب زکوٰۃ و عشر کونسل کی سب کمیٹی کا اجلاس 90 شاہراہ قائد اعظم پر منعقد ہوا۔ سینیٹر ڈاکٹر غوث محمد خان نیازی،ملک افتخار احمد ایم پی اے، پارلیمانی سیکرٹری برائے زکوٰۃ وعشر زبیر احمد اور دیگر ممبران صوبائی اسمبلی نے اجلاس میں شرکت کی۔ ایڈمنسٹریٹر زکوٰۃ وعشر پنجاب اور محکمہ کے دیگر افسران نے بھی اجلاس میں شرکت کی۔ اجلاس میں متفقہ طور پر فیصلہ کیا گیا کہ مستحقین زکوٰۃ کو فری ای بائیکس دئیے جائیں گے۔
راشد اقبال نصر اللہ نے کہا کہ پنجاب بھر میں مستحق طلبہ و طالبات کو دس ہزار مفت ای بائیکس دینے کا فیصلہ متفقہ طور پر کیا گیا ہے۔ پہلے مرحلہ میں دو ھزار بائیکس دی جائیں گی۔راشد اقبال نصر اللہ نے کہا کہ ای بائیکس کی فراہمی کا منصوبہ وزیر اعلیٰ پنجاب کی ہدایات پر شروع کر رہے ہیں ۔مستحقین زکوٰۃ کی مدد کیلئے مزید فلاحی منصوبے شروع کیے جائیں گے ۔معاون خصوصی وزیر اعلیٰ پنجاب نے کہا کہ محکمہ زکوٰۃ و عشر کی بہترین کارکردگی سے مخیر حضرات میں اعتماد بڑھے گا۔
