لاہور،26اپریل(اے پی پی):لیبیا کے ساحل کے قریب کشتی حادثے میں جاں بحق ہونے والے چھ پاکستانی شہریوں کی میتیں وطن واپس منتقل کر دی گئیں۔ یہ میتیں ہفتہ کے روز قطر ایئر ویز کی پرواز کے ذریعے علامہ اقبال انٹرنیشنل ایئرپورٹ لاہور لائی گئیں۔اوورسیز پاکستانیز فاؤنڈیشن پنجاب کی ریجنل ہیڈ سیدہ صبا فاطمہ حسن ، رشید احمد ڈوگر ایئرپورٹ انچارج ،او پی ایف و دیگر حکام نے میتیں وصول کرکے انہیں ورثا کی موجودگی میں ایمبولینسوں کے ذریعے ان کے آبائی علاقوں کو روانہ کیا۔جاں بحق ہونے والوں میں زاہد محمود (گوجرانوالہ)، محمد وسیم( گوجرانوالہ)، سید علی حسین (منڈی بہاؤالدین)، آصف علی (منڈی بہاؤالدین )، صائمہ نواز (منڈی بہاؤالدین) اور عبداللہ (سیالکوٹ ) شامل ہیں۔
