لاہور،29 اپریل(اے پی پی):صوبائی وزیر صحت و چیئرمین کابینہ کمیٹی برائے امن و امان خواجہ سلمان رفیق کی علامہ اقبال انٹرنیشنل ایئرپورٹ لاہور پر عازمین حج کے اعزاز میں منعقدہ تقریب میں بطور مہمان خصوصی شرکت کی۔اس موقع پر چیف آپریٹنگ آفیسر پاکستان ایئر پورٹس اتھارٹی چوہدری نواز، ڈی جی اینٹی نارکوٹکس برگیڈیئر چوہدری سکندر حیات، ڈائریکٹر حج سینٹرل پنجاب محمد رضوان شریف، کسٹم حکام، ایف آئی اے حکام و دیگر متعلقہ محکمہ جات کے افسران موجود تھے۔
تقریب کا باقاعدہ آغاز تلاوت کلام پاک سے کیا گیا۔اس موقع پر صوبائی وزیر صحت خواجہ سلمان رفیق نے عازمین حج کو پھولوں کے ہار پہنائے اور کیک بھی کاٹا۔صوبائی وزیر صحت خواجہ سلمان رفیق کا تقریب کے شرکاء سے خطاب کرتے ہوئے کہا کہ میں یہاں وزیر اعلیٰ پنجاب مریم نواز شریف کی نمائندگی کر رہا ہوں۔عازمین حج کو حجاز مقدس کا متبارک سفر مبارک ہو۔ خواجہ سلمان رفیق نے کہا کہ اللہ تعالیٰ نے عازمین حج کو مدینہ منورہ کا پاک سفر نصیب کیا،مدینہ کے سفر کا ہر مسلمان خواہش مند ہوتا ہے۔یہ عازمین حج کی لاہور سے پہلی فلائٹ ہے۔ خواجہ سلمان رفیق نے کہا کہ عازمین حج روضہ رسول صلی اللہ علیہ وآلہ وسلم پر اہل وطن کو اپنی دعاؤں میں ضرور یاد رکھیں۔
