اسلام آباد، 29 مئی (اے پی پی): وفاقی وزیر برائے منصوبہ بندی و ترقی احسن اقبال نے کہا ہے کہ پاکستان اپنی صنعتی پالیسی، ہنر کی تربیت، لاجسٹکس اور تعلیم کو علاقائی منڈیوں کے تقاضوں سے ہم آہنگ کرنے کے لیے کام کر رہا ہے۔
جمعرات کو اسلام آباد میں ایک کانفرنس سے خطاب کرتے ہوئے انہوں نے کہا کہ ہم کاروباری اور تعلیمی مسافروں کے لیے ویزہ سہولیات کو بھی وسعت دے رہے ہیں۔
احسن اقبال نے کہا کہ سی پیک کے دوسرے مرحلے کا محور صنعتی تعاون اور خصوصی اقتصادی زونز ہیں۔ انہوں نے کہا کہ یہ زونز مینوفیکچرنگ، خوراک کی پراسیسنگ اور لاجسٹکس کے شعبوں میں مشترکہ منصوبوں کے مواقع فراہم کرتے ہیں۔
انہوں نے علاقائی ممالک پر زور دیا کہ وہ پاکستان کے خصوصی اقتصادی زونز کے ساتھ اپنی ویلیو چینز کو منسلک کریں، سرحد پار صنعتی خوشہ جات دریافت کریں اور چین، آسیان اور مشرق وسطیٰ کے ساتھ پاکستان کے ترجیحی تجارتی معاہدوں سے فائدہ اٹھائیں۔
